US Visa: 10 రోజుల్లోనే ఇంటర్వ్యూ, సూపర్ ఫాస్ట్ సర్వీస్!
అమెరికా (USA) వెళ్లాలనుకునే పర్యాటకులు, వ్యాపారవేత్తలకు అక్కడి ప్రభుత్వం ఒక గుడ్ న్యూస్ చెప్పింది. యూఎస్ వీసా ఇంటర్వ్యూ కోసం నెలల తరబడి వేచి చూసే పని లేకుండా, కేవలం పది రోజుల్లోనే ఇంటర్వ్యూ స్లాట్ దక్కించుకునేలా ఒక సరికొత్త 'ప్రీమియం' త్వరితగతిన (Expedited) సర్వీస్ను ప్రవేశపెట్టబోతోంది. అయితే, ఈ అత్యవసర సేవలను ఉపయోగించుకోవాలంటే దరఖాస్తుదారులు జేబులు గట్టిగా గుల్ల చేసుకోవాల్సిందే. సాధారణ వీసా ఫీజు అయిన 185 డాలర్లకు అదనంగా, మరో 750 డాలర్లు (భారత కరెన్సీలో దాదాపు రూ. 62,000 పైమాటే) చెల్లించాల్సి ఉంటుందని యూఎస్ స్టేట్ డిపార్ట్మెంట్ పేర్కొంది.
ఈ సరికొత్త ప్రీమియం వీసా ప్రోగ్రామ్కు సంబంధించిన అధికారిక ప్రకటనను యూఎస్ స్టేట్ డిపార్ట్మెంట్ ఈ వారంలోనే 'ఫెడరల్ రిజిస్టర్'లో ప్రచురించనుంది. ఈ ప్రతిపాదిత పథకాన్ని తొలుత పైలట్ ప్రాజెక్ట్గా ఈ ఏడాది జూలై 1 నుంచి డిసెంబర్ 31 వరకు నిర్వహించనున్నారు. ఈ ఆరు నెలల కాలంలో వచ్చే డిమాండ్ను బట్టి, దీనిని భవిష్యత్తులో కూడా పొడిగించే అవకాశం ఉందని అంతర్గత పత్రాల ద్వారా తెలుస్తోంది. ఈ ఫీజు చెల్లించిన 10 రోజుల్లోనే ఎంపిక చేసిన అమెరికా రాయబార కార్యాలయాలు (Embassies), కాన్సులేట్లలో ఇంటర్వ్యూ తేదీని ఖరారు చేస్తారు.
వీసా ఇంటర్వ్యూల జాప్యానికి చెక్!
గత ట్రంప్ పరిపాలనా కాలంలో అమెరికాలోకి విదేశీయుల రాకను కఠినతరం చేస్తూ తీసుకున్న కొన్ని నిర్ణయాల వల్ల ప్రపంచవ్యాప్తంగా వీసా ప్రాసెసింగ్లో విపరీతమైన ఆలస్యం జరుగుతోంది. కొన్ని ఆఫ్రికా దేశాల నుండి వచ్చే వారి కోసం ఏకంగా 15,000 డాలర్ల వరకు బాండ్లు డిపాజిట్ చేయాలని నిబంధనలు పెట్టడం, వీసా దరఖాస్తుదారుల గత కొన్నేళ్ల వ్యక్తిగత చరిత్రతో పాటు సోషల్ మీడియా అకౌంట్లను కూడా క్షుణ్ణంగా తనిఖీ చేయడం (వెట్టింగ్) వంటి కారణాల వల్ల తీవ్ర జాప్యం జరుగుతోంది.
ప్రస్తుతం వీసా వేవర్ ప్రోగ్రామ్ పరిధిలోకి రాని భారత్ వంటి దేశాల పౌరులు వీసా ఇంటర్వ్యూ స్లాట్ కోసం నెలల తరబడి వేచి చూడాల్సి వస్తోంది. ఈ సమస్యల నుండి ఉపశమనం కలిగించేందుకే అమెరికా ఈ ప్రీమియం సర్వీస్ను ముందుకు తెచ్చింది.
డబ్బులు కట్టినా వీసా గ్యారెంటీ లేదు.. గుర్తుంచుకోండి!
ఈ ప్రీమియం సర్వీస్ కింద 750 డాలర్ల భారీ మొత్తాన్ని చెల్లించినంత మాత్రాన వీసా ఖచ్చితంగా వస్తుందనే గ్యారెంటీ ఏమీ లేదని అధికారులు స్పష్టం చేశారు. ఇది కేవలం ఇంటర్వ్యూను త్వరగా షెడ్యూల్ చేసుకోవడానికి మాత్రమే ఉపయోగపడే ఒక 'ఐచ్ఛిక ప్రీమియం యాడ్-ఆన్ సర్వీస్' (Optional Premium Add-on Service).
ఇంటర్వ్యూలో మీ అర్హతలు, పత్రాలు సరిగ్గా ఉంటేనే వీసా మంజూరు అవుతుంది, ఒకవేళ వీసా తిరస్కరణకు గురైతే ఈ ప్రీమియం ఫీజు వెనక్కి రాదు. జూలై 1న ఈ ప్రోగ్రామ్ ప్రారంభం కావడానికి ముందే, ప్రపంచవ్యాప్తంగా ఏయే ఎంబసీలు, కాన్సులేట్లలో ఈ సేవలు అందుబాటులో ఉంటాయో అమెరికా అధికారికంగా ప్రకటించనుంది.
Click it and Unblock the Notifications
Sign in with Google