ప్రపంచంలోనే ఎత్తైన వంతెన ప్రారంభం: 2 గంటల ప్రయాణం కేవలం 5 నిమిషాల్లోనే!

Huajiang Grand Canyon Bridge: అసాధ్యమనుకున్న ఇంజనీరింగ్ అద్భుతాన్ని చైనా సుసాధ్యం చేసింది. గూయిఝౌ ప్రావిన్స్‌లోని హువాజియాంగ్ గ్రాండ్ కాన్యాన్ లోయపై నిర్మించిన ప్రపంచంలోనే అత్యంత ఎత్తైన వంతెనను చైనా ప్రారంభించింది. ఈ వంతెన ద్వారా రెండు గంటల ప్రయాణ సమయం కేవలం 5 నిమిషాలకు తగ్గిపోనుంది. 3 సంవత్సరాలకు పైగా నిర్మించిన ఈ వంతెన.. లోయ అడుగు భాగం నుంచి ఏకంగా 625 మీటర్ల (సుమారు 2,050 అడుగులు) ఎత్తులో ఉంది. దీంతో ఇది ప్రపంచంలోనే ఎత్తైన వంతెనగా రికార్డు సృష్టించింది.

ప్రయాణ సమయం కేవలం రెండు నిమిషాలు!
గతంలో హువాజియాంగ్ గ్రాండ్ కాన్యన్‌ను దాటడానికి స్థానిక ప్రజలకు రెండు గంటలు పట్టేది. ఈ వంతెన అందుబాటులోకి రావడంతో లోయ దాటే ప్రయాణ సమయం రెండు గంటల నుంచి కేవలం 5 నిమిషాలకు తగ్గింది. ట్రాన్స్‌పోర్ట్ విభాగం అధికారి ఝాంగ్ యిన్ ప్రకారం.. వంతెన రెండు వైపులా ఉన్న తీరాల మధ్య ప్రయాణ సమయం రెండు నిమిషాలుగా నమోదైంది.

ఈ వంతెన మొత్తం 1,420 మీటర్లు (దాదాపు 4,659 అడుగులు) విస్తరించి ఉంది. ఈ కొత్త లింక్ స్థానిక రవాణా వ్యవస్థను మెరుగుపరచి, ఆ ప్రాంత ఆర్థిక, సామాజిక అభివృద్ధికి కొత్త వేగాన్ని అందిస్తుందని అంచనా వేస్తున్నారు. ఈ వంతెన 190 కిలోమీటర్ల పొడవైన శాంటియన్-పుక్సీ ఎక్స్‌ప్రెస్‌వేలో భాగం.

ప్రపంచంలోనే ఎత్తైన వంతెనగా రికార్డు
చైనాలోని ఈ వంతెన ప్రపంచ రికార్డును సొంతం చేసుకుంది. ఇది భూమి నుంచి 625 మీటర్ల ఎత్తులో ఉంది. గతంలో ప్రపంచంలో అత్యంత ఎత్తైన వంతెనగా ఉన్న బేయిపాన్జియాంగ్ వంతెన (Beipanjiang Bridge), 565 మీటర్ల ఎత్తుతో ఇప్పుడు రెండో స్థానానికి పడిపోయింది. ఈ నాలుగు లేన్ల వంతెన, ప్రాంతీయ అనుసంధానతను పెంచడానికి ఉపయోగపడుతుంది. ప్రపంచంలోని అత్యంత ఎత్తైన 100 వంతెనలలో దాదాపు 50 వంతెనలు ఇదే గూయిఝౌ ప్రావిన్స్‌లో ఉండటం విశేషం.

ఐఫిల్ టవర్ కంటే మూడు రెట్లు బరువు
ఈ వంతెన నిర్మాణం అధునాతన ఇంజనీరింగ్ పరాక్రమానికి నిదర్శనం. హువాజియాంగ్ గ్రాండ్ కాన్యన్ వంతెన నిర్మాణానికి మూడేళ్లకు పైగా సమయం పట్టింది. సౌత్ చైనా మార్నింగ్ పోస్ట్ నివేదిక ప్రకారం, ఈ ప్రధాన వంతెనను 93 స్టీల్ ట్రస్ సెగ్మెంట్లతో నిర్మించారు. దీని మొత్తం బరువు దాదాపు 22,000 టన్నులు, ఇది ఐఫిల్ టవర్ బరువు కంటే మూడు రెట్లు ఎక్కువ. ఇంజనీర్లు వేగవంతమైన గాలులు, సవాలుతో కూడిన భౌగోళిక భూభాగాల సమస్యలను అధిగమించి దీనిని నిర్మించారు. ఈ ప్రాజెక్ట్ 21 అధికారిక పేటెంట్లను కూడా పొందింది. భవిష్యత్ నిర్మాణ ప్రాజెక్టుల కోసం దీనిలోని కొన్ని సాంకేతిక అంశాలను జాతీయ ప్రమాణాలుగా చేర్చారు. ఈ వంతెనలో డైమెన్షనల్ లిడార్ డిటెక్షన్, బీడు డైనమిక్ పొజిషనింగ్, ఇంటెలిజెంట్ ట్రాన్స్‌పోర్టేషన్ సిస్టమ్ వంటి అధునాతన సాంకేతికతలు ఉపయోగించారు.

English summary

China unveils the Huajiang Grand Canyon Bridge in Guizhou, standing 625 meters high, setting a new world record. The engineering marvel drastically cuts travel time across the canyon from two hours to just five minutes.