సోషల్ మీడియాని షేక్ చేసిన యువతి.. 24 గంటల్లోనే కోటి మంది ఫాలోవర్స్ !!!
చైనాకు చెందిన ప్రముఖ బ్యూటీ ఇన్ఫ్లుయెన్సర్ జియాంగ్ చెంగ్లాన్ మరోసారి సోషల్ మీడియాను షేక్ చేస్తున్నారు. మూడేళ్ల సుదీర్ఘ విరామం తర్వాత ఆమె తిరిగి ఆన్లైన్లోకి అడుగుపెట్టగా, కేవలం 24 గంటల్లోనే కోటి మందికి పైగా ఫాలోవర్లు ఆమె కొత్త అకౌంట్ను ఫాలో కావడం విశేషంగా మారింది. ఈ అరుదైన ఫీట్తో ఆమె అంతర్జాతీయ స్థాయిలో చర్చనీయాంశమయ్యారు. ప్రస్తుతం ఈ వ్యవహారం హాట్ టాపిక్ గా మారింది.
సోషల్ మీడియాలో అరుదైన రికార్డు
ప్రస్తుతం ప్రపంచవ్యాప్తంగా సోషల్ మీడియా ప్లాట్ఫారమ్లలో భారీ ఫాలోయింగ్ సంపాదించడం ఎంతో కష్టంగా మారింది. అయితే జియాంగ్ చెంగ్లాన్ మాత్రం అభిమానుల ప్రేమతో ఒక్క రోజులోనే 10 మిలియన్లకు పైగా ఫాలోవర్లను సంపాదించి సంచలనం సృష్టించారు. ఈ ఫీట్ను చూసి నెటిజన్లు ఆమెను "చైనా సోషల్ మీడియా క్వీన్"గా అభివర్ణిస్తున్నారు. ఆమె రీఎంట్రీని పలువురు ఫుట్బాల్ స్టార్ Cristiano Ronaldo యూట్యూబ్ రికార్డులతో పోలుస్తూ సోషల్ మీడియాలో పోస్టులు చేస్తున్నారు.
గతంలోనే కోట్లాది అభిమానులు
జియాంగ్ చెంగ్లాన్కు చైనా ప్రముఖ వీడియో ప్లాట్ఫారమ్ 'డౌయిన్'లో ఇప్పటికే భారీ క్రేజ్ ఉండేది. ఆమె పాత అకౌంట్కు దాదాపు మూడు కోట్ల మంది ఫాలోవర్లు ఉండేవారు. మేకప్ టిప్స్, స్కిన్కేర్ వీడియోలు, ఫ్యాషన్ కంటెంట్తో యువతలో ఆమెకు ప్రత్యేక గుర్తింపు ఏర్పడింది. ఆమె వీడియోలు కోట్ల వ్యూస్ సాధిస్తూ, చైనాలో అత్యంత ప్రభావవంతమైన డిజిటల్ సెలబ్రిటీలలో ఒకరిగా నిలిచారు.
మూడేళ్ల విరామానికి కారణం అదే..?
2023 మే తర్వాత జియాంగ్ చెంగ్లాన్ అకస్మాత్తుగా సోషల్ మీడియా నుంచి కనిపించకుండా పోవడంతో అభిమానులు ఆందోళన చెందారు. తర్వాత తెలిసిందేమిటంటే, ఆమె మాజీ ఏజెన్సీ 'షాంఘై జిన్ జియా కంపెనీ'తో ట్రేడ్మార్క్ వివాదం తలెత్తింది. ఆమె ఉపయోగిస్తున్న 'చెంగ్షియాన్' అనే పేరును ఏజెన్సీ ట్రేడ్మార్క్గా నమోదు చేసుకోవడంతో, అదే పేరుతో కొనసాగడం ఆమెకు కష్టమైంది. ఈ వివాదం కారణంగానే ఆమె సోషల్ మీడియా నుంచి దూరంగా ఉండాల్సి వచ్చినట్లు చైనా మీడియా వెల్లడించింది.
కొత్త పేరుతో గ్రాండ్ రీఎంట్రీ..
తాజాగా మే 13న జియాంగ్ చెంగ్లాన్ తన అసలు పేరుతో కొత్త అకౌంట్ను ప్రారంభించారు. అకౌంట్ ఓపెన్ చేసిన కొద్ది గంటల్లోనే అభిమానులు భారీగా ఆమెను ఫాలో అవ్వడం మొదలుపెట్టారు. ఆమె తిరిగి రావడంతో సోషల్ మీడియాలో #JiangChenglan, #BeautyQueenReturns వంటి హ్యాష్ట్యాగ్లు ట్రెండ్ అయ్యాయి. అనేక మంది అభిమానులు "మూడేళ్లు ఎదురుచూశాం", "క్వీన్ ఈజ్ బ్యాక్" అంటూ కామెంట్లు చేశారు. తనకు లభిస్తున్న అపారమైన ఆదరణపై జియాంగ్ చెంగ్లాన్ భావోద్వేగానికి గురయ్యారు. అభిమానులకు ధన్యవాదాలు తెలుపుతూ ఒక ప్రత్యేక వీడియో సందేశం విడుదల చేశారు. "నా పాత అకౌంట్తో లేదా దానికి అనుబంధంగా ఉన్న షాపులతో నాకు ఎలాంటి సంబంధం లేదు. దయచేసి నా పేరును నమ్మి అక్కడి నుంచి ఉత్పత్తులు కొనుగోలు చేయవద్దు" అని ఆమె స్పష్టం చేశారు.
సోషల్ మీడియా నిపుణుల అభిప్రాయం ప్రకారం, జియాంగ్ చెంగ్లాన్ రీఎంట్రీ చైనా డిజిటల్ మార్కెటింగ్ రంగంలో పెద్ద ప్రభావం చూపే అవకాశం ఉంది. ఆమెకు ఉన్న ఫాలోయింగ్ కారణంగా ప్రముఖ బ్యూటీ, ఫ్యాషన్ బ్రాండ్లు ఇప్పటికే ఆమెతో ఒప్పందాల కోసం ప్రయత్నిస్తున్నట్లు సమాచారం. మూడేళ్ల విరామం తర్వాత కూడా అభిమానుల మద్దతు ఏమాత్రం తగ్గకపోవడం, ఆమె ప్రభావం ఎంత బలంగా ఉందో మరోసారి నిరూపించింది.
Click it and Unblock the Notifications
Sign in with Google