దుమ్ము దులిపిన కెనడా
ఫిఫా వరల్డ్ కప్లో కెనడా నూతన చరిత్ర సృష్టించింది. గ్రూప్ బీలో భాగంగా వాంకోవర్ బీసీ ప్లేస్ స్టేడియంలో జరిగిన మ్యాచ్లో దుమ్ము లేపింది. తడాఖా చూపింది. ఖతార్పై ఏకంగా ఆరు గోల్స్ సాధించింది. 6-0 తేడాతో కెనడా ఘన విజయం సాధించింది. ప్రపంచకప్ చరిత్రలో కెనడాకు ఇదే తొలి విజయం కావడం కూడా విశేషం. మ్యాచ్ సమయంలో చోటు చేసుకున్న ఉద్రిక్తతలు, కెనడియన్ మిడ్ఫీల్డర్ ఇస్మాయిల్ కోనే తీవ్రంగా గాయపడటం ఈ చారిత్రక విజయంపై నీలి నీడలు కమ్మేలా చేశాయి.
మ్యాచ్ ముగిసిన తర్వాత కూడా ఇరు జట్ల ఆటగాళ్లు పరస్పరం ఘర్షణకు దిగడంతో వ్యాంకోవర్ మైదానం రణరంగంగా మారింది. కెనడా తరఫున జోనాథన్ డేవిడ్ అద్భుతమైన హాట్రిక్ గోల్స్తో చెలరేగగా, సైల్ లారిన్, నాథన్ సలీబా తలో గోల్ సాధించారు. ఖతార్ డిఫెండర్ మొహమ్మద్ మనాయ్ చేసిన సెల్ఫ్ గోల్ కెనడా ఆధిక్యాన్ని మరింత పెంచింది. మ్యాచ్ ప్రారంభం నుంచే దూకుడు ప్రదర్శించిన కెనడా జట్టు, ప్రత్యర్థి రక్షణ శ్రేణిని పూర్తిగా ఛేదిస్తూ ఏకపక్షంగా గోల్స్ సాధించింది. ఖతార్ ఆటగాళ్ల క్రమశిక్షణా రాహిత్యం ఆ జట్టు కొంపముంచింది.
పండుగ వాతావరణంలో సాగుతున్న మ్యాచ్లో కెనడా మిడ్ఫీల్డర్ ఇస్మాయిల్ కోనేకు జరిగిన గాయం మైదానంలో విషాదాన్ని నింపింది. మ్యాచ్ 51వ నిమిషంలో ఖతార్ ఆటగాడు అసిమ్ మాడిబో వెనుక నుంచి కోనేను బలంగా ఢీకొట్టాడు. దీంతో కోనే ఎడమ కాలుకు తీవ్ర గాయమై మైదానంలోనే నొప్పితో విలవిలలాడాడు. మెడికల్ స్టాఫ్ అతనికి అత్యవసర చికిత్స అందించి, ఆక్సిజన్ సాయంతో స్ట్రెచర్పై మైదానం వెలుపలికి తీసుకెళ్లారు.
ఈ ఫౌల్ను తీవ్రంగా పరిగణించిన రిఫరీ, వీఏఆర్ (VAR) రివ్యూ అనంతరం అసిమ్ మాడిబోకు రెడ్ కార్డ్ చూపించి మైదానం నుంచి పంపించివేశారు. తొలి భాగంలోనే హోమామ్ అహ్మద్ రెడ్ కార్డ్ పొంది వెనుదిరగడంతో, ఖతార్ జట్టు కేవలం తొమ్మిది మంది ఆటగాళ్లతోనే ఆడాల్సి వచ్చింది. ఈ పరిణామాన్ని కెనడా పూర్తిగా ఉపయోగించుకుంది. కోనే స్థానంలో మైదానంలోకి వచ్చిన నాథన్ సలీబా అద్భుతమైన ఫ్రీ కిక్తో గోల్ సాధించి, కోనే జెర్సీని ప్రదర్శిస్తూ తన సహచరుడికి మద్దతుగా నిలిచాడు.
ఈ మ్యాచ్లో హాట్రిక్ సాధించిన జోనాథన్ డేవిడ్ పలు అరుదైన రికార్డులను తన పేరిట లిఖించుకున్నాడు. 1930 తర్వాత ప్రపంచకప్లో హాట్రిక్ సాధించిన మొదటి కాంకాకాఫ్ ఆటగాడిగా డేవిడ్ రికార్డు సృష్టించాడు. అలాగే ప్రపంచకప్లో ఒకే మ్యాచ్లో ఒకటి కంటే ఎక్కువ గోల్స్ చేసిన మొదటి కెనడియన్ ఆటగాడిగా నిలిచాడు. ఈ అద్భుత విజయంతో కెనడా శిబిరంలో ఆనందం వ్యక్తమైనప్పటికీ, కోనే గాయం ఆటగాళ్లను కలవరపెట్టింది.
మ్యాచ్ ముగిసిన వెంటనే ఇరు జట్ల ఆటగాళ్ల మధ్య మైదానం మధ్యలో తీవ్ర ఘర్షణ చోటుచేసుకుంది. ఒకరినొకరు నెట్టుకుంటూ దాడులకు దిగడంతో ఫిఫా అధికారులు జోక్యం చేసుకుని పరిస్థితిని అదుపులోకి తెచ్చారు. గ్రూప్ బీలో అగ్రస్థానంలో నిలవడానికి కెనడాకు తన తదుపరి మ్యాచ్లో స్విట్జర్లాండ్తో డ్రా చేసుకున్నా సరిపోతుంది. మరోవైపు ఘోర పరాజయాన్ని చవిచూసిన ఖతార్ జట్టు గ్రూప్లో మూడో స్థానాన్ని దక్కించుకోవడానికి బోస్నియా హెర్జెగోవినాతో జరగబోయే తదుపరి మ్యాచ్లో గెలవాల్సి ఉంటుంది. ఈ ఘోర పరాజయం ఖతార్ ప్రపంచకప్ ఆశలను దెబ్బతీసింది.
Click it and Unblock the Notifications
Sign in with Google