చిరంజీవి వర్సెస్ జగన్ రాజకీయాలు!

హైదరాబాద్: ఇద్దరు యాచకులు ఒకే చోటికి వెళ్ళవలసి వస్తే శత్రువులు అవుతారు. అలాగే ఉంది ఇప్పుడు జగన్, చిరంజీవి వ్యవహారం. కాంగ్రెసు‌ పార్టీకి రోజు రోజుకూ దగ్గరయ్యేందుకు ప్రధాన ప్రతిపక్షమైన తెలుగుదేశం పార్టీపై విమర్శలు గుప్పిస్తూ అధికార పార్టీతో బలమైన మైత్రీబంధానికి పునాదులు వేసుకుంటున్న ప్రజారాజ్యం పార్టీకి, ఆ పార్టీ అధ్యక్షుడు చిరంజీవికి చెక్‌ పెట్టేందుకు యువనేత జగన్‌ వ్యూహాత్మకంగా పావులు కదుపుతున్నారు. కాపు సామాజిక వర్గంలో చిరంజీవికి బలం ఉన్నందున, ఆయన పార్టీనిదరికి చేర్చుకుని లబ్ధి పొందాలని చూస్తున్న కాంగ్రెసు‌ నాయకత్వానికి ఉభయ గోదావరి జిల్లాల్లోని కాపులంతా తనవెంటే ఉన్నారన్న సంకేతాలు పంపేందుకు జగన్‌ హటాత్తుగా కాపు నేత ముద్రగడ పద్మనాభాన్ని తెరపైకి తీసుకురావడం చర్చనీ యాంశమయింది.

తనకు చెక్‌ పెట్టేందుకు చిరంజీవిని తీసుకురావాలన్న ముఖ్యమంత్రి రోశయ్యకూ జగన్‌ ఝలక్‌ ఇచ్చేందుకు సిద్ధమవుతున్నారు. వచ్చే నెల 8 నుంచి శ్రీకాకుళం నుంచి ప్రారంభం కానున్న ఓదార్పు యాత్ర తర్వాత జగన్‌ తూర్పు గోదావరి జిల్లాలో పర్యటించనున్న ట్లు సమాచారం. ఆ సందర్భంగా కాపుల ఖిల్లాగా పేరున్న తూర్పు గోదావరి జిల్లా చరిత్రలో కనీవినీ ఎరుగని స్థాయి లో జన సమీకరణ చేసేందుకు జగన్‌ వర్గం సన్నాహాలు చేస్తున్నట్లు తెలిసింది. ముగ్గురు మంత్రులు, జడ్పీ ఛైర్మన్‌, కొంతమంది ఎమ్మెల్యేలు ఈ మేరకు కాకినాడలోని గెస్ట్‌ హౌస్‌లో కొద్దిరోజుల నుంచి వరసగా భేటీలు వేస్తున్నట్లు సమాచారం. మంత్రి పిల్లి, విశ్వరూప్‌, వట్టి వసంతకుమా ర్‌ జనసమీకరణపై దృష్టి సారించినట్లు తెలిసింది. నిధుల సమీకరణ, జనసమీకరణ వంటి కీలకమైన అంశాలను కాకినాడ ఎమ్మెల్యే చంద్రశేఖరరెడ్డి తెరవెనుక ఉండి నడిపి స్తున్నట్లు పార్టీ వర్గాలు చెబుతున్నాయి.

తూర్పు గోదావరి రాజకీయ చరిత్రలో ఇప్పటివరకూ ఏ నాయకుడికీ రానంత జనాలను సమీకరించాలన్న లక్ష్యంతో ఓదార్పు యాత్రకు ప్రణాళిక రూపొందిస్తున్నారు. చిరంజీవి ప్రజారాజ్యం పార్టీకి పట్టు, ఎమ్మెల్యేల సంఖ్య కూడా ఎక్కువగా ఉన్న తూర్పు గోదావరి జిల్లాలో చిరంజీవి కన్నా తనకే ప్రజాదరణ, ప్రజాకర్షణ ఉందన్న సంకేతాలను అధిష్ఠానానికి పంపేందుకు జగన్‌ వర్గీయులు జన సమీకరణపై దృష్టి సారిస్తున్నారు.