చెర్రీ, ఉపాసన నిశ్చితార్థం తేదీ ఖరారు

మెగాస్టార్ చిరంజీవి కుమారుడు, సినీ హీరో రామ్ చరణ్ తేజ్, ఉపాసన కామినేని నిశ్చితార్థం తేదీ ఖరారైంది. వీరిద్దరి నిశ్చితార్థం డిసెంబర్ 1వ తేదీన జరుగుతుందని సమాచారం. ఈ విషయాన్ని మెగాస్టార్, కాంగ్రెసు నేత చిరంజీవి రాష్ట్ర గవర్నర్ నరసింహన్ దంపతులకు స్వయంగా చెప్పారని అంటున్నారు. తన నిశ్చితార్థానికి రావాలని చెర్రీ గవర్నర్‌ దంపతులను ఆహ్వానించారని తెలుస్తోంది. అందుకు గవర్నర్ దంపతులు ఆనందంగా అంగీకరించారని ప్రచారం జరుగుతోంది. చిరంజీవి తన సతీమణి సురేఖ, కుమారుడు రామ్ చరణ్ తేజ్‌లతో కలిసి బుధవారం రాజభవన్ వచ్చారు. వారు గవర్నర్ దంపతులకు దీపావళి శుభాకాంక్షలు తెలిపారు. అదే సమయంలో చెర్రీ, ఉపాసనల నిశ్చితార్థం తేదీని చిరంజీవి గవర్నర్ చెవిన వేశారని అంటున్నారు.

నిశ్చితార్థం, పెళ్లి కాకుండానే చెర్రీ, ఉపాసన కలిసి తిరుగుతున్నారు. ఇటీవల పోలో పోటీల్లో కలిసి హడావిడి చేశారు. రామ్ చరణ్ తేజ్, ఉపాసనల నిశ్చితార్థం నిజామాబాద్ జిల్లా దోమకొండలోని గడీలో జరుగుతుందని చెబుతున్నారు. ఆ గడీ ఉపాసన తాతకు సంబంధించింది. సంప్రదాయం ప్రకారం ఆ గడీలోనే నిశ్చితార్థం, వివాహం జరగాలని ఉపాసన కుటుంబ సభ్యులు భావించారని సమాచారం. దానికి చిరంజీవి కుటుంబ సభ్యులు అంగీకరించారని చెబుతున్నారు.

చెర్రీ, ఉపాసనల నిశ్చితార్థానికి దోమకొండలోని కోట ఇప్పటికే సిద్ధమైంది. నిశ్చితార్థం, పెళ్లి కూడా అంగరంగ వైభవంగా జరగాలని ఇరు కుటుంబాల సభ్యులు భావిస్తున్నారు. అందుకు అనుగుణంగానే ఏర్పాట్లు జరుగుతున్నాయి.

English summary

It is learnt that engagement date of Ram Charan Tej and Upasana is finalised.