'రెబెల్' నుంచి జ్వాలాను ఆజర్ లాగాడా?

By Pratap

Published: Wednesday, September 7, 2011, 13:24 [IST]

అందానికి అందం, ఆటకు ఆట ఉన్న బ్యాడ్మింటన్ క్రీడాకారిణి జ్వాలా గుత్తాపై చిత్ర నిర్మాతల కన్ను పడడం ఆశ్చర్యమేమీ కాదు. గతంలో టెన్నిస్ క్రీడాకారిణి సానియా మీర్జా వెంట కూడా వారు పడ్డారు. ఆమె సినిమాల్లో నటిస్తుందంటూ ఊదరగొట్టారు. తాజాగా, జ్వాలా గుత్తా ఒత్తిడి వల్లనో, మరో కారణం వల్లనో సినిమాల్లో నటిస్తానని చెప్పింది. దాన్ని ఆసరాగా తీసుకుని ప్రభాస్ హీరోగా నటిస్తున్న రెబెల్ చిత్రం కోసం ఆమెను సంప్రదించారు. ప్రభాస్‌ అంటే తనకు చాలా ఇష్టమని చెప్పిన జ్వాలా ప్రకటన వారికి అందుకు అవకాశం ఇచ్చింది. అవకాశం వస్తే ప్రభాస్ సరసన నటిస్తానని ఆమె చెప్పింది.

రెబెల్ నిర్మాతలు సంప్రదిస్తే ఆమె అంగీకరించడానికి కూడా దాదాపు సిద్ధపడినట్లు వార్తలు వచ్చాయి. అయితే, అనూహ్యంగా పార్లమెంటు సభ్యుడు, భారత క్రికెట్ జట్టు మాజీ కెప్టెన్ మొహ్మద్ అజరుద్దీన్ అడ్డు వచ్చాడని తెలుస్తోంది. ప్రభాస్‌తో జ్వాలా నటించడానికి ఆయన అంగీకరించలేదంటూ ఓ వార్త వచ్చింది.

జ్వాలా గుత్తా అజరుద్దీన్ కుటుంబానికి అత్యంత సన్నిహితురాలు. జ్వాలా, అజర్ మధ్య అఫైర్ నడుస్తున్నట్లు పెద్ద యెత్తున మీడియాలో ఊహాగానాలు చెలరేగాయి. దానివల్లనే జ్వాలా గుత్తాకు, చేతన్ ఆనంద్‌కు మధ్య విభేదాలు వచ్చి విడాకులు తీసుకున్నట్లు చెబుతారు. అయితే, అజర్ ప్లాన్ మరో రకంగా ఉందని చెబుతున్నారు. జ్వాలాను బాలీవుడ్ ద్వారా పెద్ద యెత్తున సినీ రంగంలోకి దించాలనేది ఆయన ఉద్దేశమని చెబుతున్నారు. ఏమైనా, ప్రభాస్‌కు జ్వాలా పక్కన నటించే అవకాశం పోయింది.

Published On September 7, 2011