సబితా ఇంద్రారెడ్డి జగన్ వెనకే...?

By Pratap

Published: Friday, September 30, 2011, 15:25 [IST]

పోలీసు శాఖ బదిలీల విషయంలో తీవ్ర వివాదంలో చిక్కుకున్న హోం మంత్రి సబితా ఇంద్రారెడ్డి ఎటు వైపు ఉంటారనేది ఇప్పుడు చర్చనీయాంశంగా మారింది. సహచర మంత్రి పి. శంకరరావు ఆరోపణల నేపథ్యంలో ఆమెపై నీలినీడలు అలుముకున్నాయి. గవర్నర్ నరసింహన్‌ను కలిసి ఆమె వివరణ ఇవ్వాల్సి వచ్చింది. సబితా ఇంద్రారెడ్డి తెలంగాణ విషయంలో అంటీముట్టనట్లుగానే ఉంటున్నారు. శాఖాపరంగా కూడా అంత చురుగ్గా ఆమె కనిపించడం లేదు. తెలంగాణ ఆందోళన చెలరేగుతూ శాంతిభద్రతల సమస్యలు తలెత్తే పరిస్థితి వస్తుందేమోననే ఆందోళన కూడా ఆమెలో ఉన్నట్లు కనిపిస్తోంది. శాంతిభద్రతల సమస్యను నేరుగా ముఖ్యమంత్రి కిరణ్ కుమార్ రెడ్డి చూస్తున్నారని అంటున్నారు.

ప్రస్తుత పరిస్థితి చూస్తుంటే సబితా ఇంద్రారెడ్డి వైయస్సార్ కాంగ్రెసు పార్టీ అధ్యక్షుడు వైయస్ జగన్ వెంట నడిచే అవకాశాలున్నట్లు ప్రచారం జరుగుతోంది. ఇప్పటికిప్పుడు ఆమె అటు వైపు వెళ్లే అవకాశాలు లేవు. 2014 ఎన్నికల నాటికి ఆమె వైయస్సార్ కాంగ్రెసు జెండాను మోయవచ్చునని అంటున్నారు. దివంగత వైయస్ రాజశేఖర రెడ్డికి ఆత్మీయమైన చెల్లెగా ఆమెకు పేరుంది. వైయస్ రాజశేఖర రెడ్డి 2009లో ఆమెను హోం మంత్రిని చేసి ఓ మహిళా నాయకురాలికి ఆ శాఖను అప్పగించిన ఘనత సాధించారు. అలాగే, ఆమె కొంత కాలం గనుల శాఖను కూడా నిర్వహించారు.

సబితా ఇంద్రారెడ్డి ఎప్పటికైనా వైయస్సార్ కాంగ్రెసు పార్టీలోకి వెళ్లేపోయేవారేనని చెబుతున్నారు. ఆమె అటు వెళ్తే గ్రేటర్ హైదరాబాదు, రంగారెడ్డి జిల్లాల్లో వైయస్సార్ కాంగ్రెసు బలపడుతుంది. ఆమె సామాజిక వర్గానికి చెందిన ప్రజలు ఈ రెండు జిల్లాల్లో ఎక్కువగా ఉన్నారు. పి. శంకరరావు చేసిన ఆరోపణల పట్ల ఆమె తీవ్ర అసంతృప్తితో ఉన్నట్లు చెబుతున్నారు.

Published On September 30, 2011