చిక్కుల్లో కిరణ్: జగన్ హ్యాపీ, టిడిపికి అస్త్రం

By Pratap

Published: Monday, March 12, 2012, 12:13 [IST]

వైయస్సార్ కాంగ్రెసు పార్టీ అధ్యక్షుడు వైయస్ జగన్ ఆస్తుల కేసులో తాజా పరిణామం ముఖ్యమంత్రి కిరణ్ కుమార్ రెడ్డిని చిక్కుల్లో పడేసినట్లే. శాసనసభ సమావేశాలు జరుగుతున్న నేపథ్యంలోనే కాకుండా ఉప ఎన్నికలు జరుగుతున్న నేపథ్యంలో తెలుగుదేశం పార్టీకి బలమైన అస్త్రం చేతికి అంది వచ్చింది. జగన్ ఆస్తుల కేసులో ఆరుగురు మంత్రులకు, 8 మంది ఐఎఎస్ అధికారులకు సుధాకర్ రెడ్డి అనే న్యాయవాది వేసిన పిటిషన్‌పై సుప్రీంకోర్టు నోటీసులు జారీ చేసింది. దీంతో కాంగ్రెసు ప్రభుత్వానికి కొత్త చిక్కు వచ్చి పడింది. కొంత మేరకు వైయస్ జగన్‌కు సంతోషాన్ని కలిగించింది.

సిబిఐ పెట్టిన కేసుల్లో ఐఎఎస్ అధికారులను మాత్రమే బలి పశువులను చేస్తున్నారని, రాజకీయ నాయకులను పట్టించుకోవడం లేదని వైయస్సార్ కాంగ్రెసు పార్టీ నాయకులు మొదటి నుంచీ విమర్శిస్తూ వస్తున్నారు. వైయస్ హయాంలో జరిగిన నిర్ణయాలకు మంత్రి వర్గ సభ్యులను కూడా బాధ్యులను చేయాలని అంటున్నారు. మంత్రులకు సుప్రీంకోర్టు నోటీసులు జారీ చేయడంతో వారి డిమాండ్ కొంత మేరకు నెరవేరినట్లే. ప్రస్తుతం కిరణ్ కుమార్ రెడ్డి మంత్రివర్గంలో కూడా పనిచేస్తున్న ఆరుగురు మంత్రులు చిక్కుల్లో పడినట్లే.

కిరణ్ కుమార్ రెడ్డి మంత్రి వర్గంలో పనిచేస్తున్న ఆరుగురు మంత్రులను తొలగించాలని తెలుగుదేశం పార్టీ డిమాండ్ చేస్తోంది. ఈ అంశంపై సోమవారం శాసనసభా కార్యక్రమాలను తెలుగుదేశం పార్టీ స్తంభింపజేసింది. కిరణ్ కుమార్ రెడ్డి ప్రభుత్వం ఎంతగా చిక్కుల్లో పడితే వైయస్ జగన్ వర్గానికి అంతగా సంతోషం వేస్తుంది. దీంతో వైయస్ జగన్ ఏదో మేరకు ఊరట పొందినట్లే చెప్పాలి.

Published On March 12, 2012