APPSC: 2018 గ్రూప్ 1 వ్యవహారంలో మరో మలుపు-హైకోర్టు సమీక్ష కోరిన ఏపీ సర్కార్..!

ఏపీలో ఏపీపీఎస్సీ 2018 లో నిర్వహించిన గ్రూప్ 1 పరీక్ష వ్యవహారం మరో మలుపు తిరిగింది. 2018లో నిర్వహించిన గ్రూప్ 1 పరీక్ష జవాబు పత్రాల్ని రెండుసార్లు మూల్యాంకనం చేయడాన్ని సవాల్ చేస్తూ పలువురు అభ్యర్ధులు హైకోర్టును ఆశ్రయించారు. దీనిపై విచారణ జరిపిన హైకోర్టు గ్రూప్ 1 పరీక్షను రద్దు చేస్తూ నిర్ణయం తీసుకుంది. ఈ నిర్ణయాన్ని ఏపీ ప్రభుత్వం తిరిగి హైకోర్టులో సవాల్ చేసింది. ఈ మేరకు ఇవాళ పిటిషన్ దాఖలు చేసింది.

2018 గ్రూప్ 1 నోటిఫికేషన్ ప్రకారం నిర్వహించిన గ్రూప్ 1 పరీక్ష జవాబు పత్రాల మూల్యాంకనం ఓసారి చేసిన తర్వాత తప్పిదాలు జరిగాయన్న కారణంతో ఏపీపీఎస్సీ మరోసారి నిర్వహించిందని అభ్యర్ధులు ఆరోపిస్తున్నారు. ఇలా రెండోసారి మూల్యాంకనం చేసిన తర్వాత ఏపీపీఎస్సీ ఫలితాలు విడుదల చేసిందని చెప్తున్నారు. దీంతో రెండోసారి మూల్యాంకనం తర్వాత ఎంపికైన అభ్యర్ధులకే ఉద్యోగాలు ఇవ్వడం వివాదాస్పదమైంది.

అయితే రెండుసార్లు మూల్యాంకనం చేయలేదన్న ఏపీపీఎస్సీ వాదనతో హైకోర్టు సింగిల్ జడ్జి అంగీకరించలేదు. చివరికి రెండుసార్లు మూల్యాంకనం జరిగిందని నిర్ధారిస్తూ పరీక్షను రద్దు చేసింది. హైకోర్టు తీర్పుపై స్పందించిన ప్రభుత్వం దీనిపై అప్పీల్ కు వెళ్తామని ప్రకటించింది. అన్నట్లుగానే ఇవాళ హైకోర్టు డివిజన్ బెంచ్ లో పిటిషన్ దాఖలు చేసింది. దీనిపై మంగళవారం అంటే రేపు విచారణ జరిపేందుకు హైకోర్టు అంగీకరించింది. దీంతో రేపటి నుంచి ఈ విచారణ జరగబోతోంది.

English summary

ap government has today filed a petition challenging high court's past verdict canceling 2018 group 1 exams due to double evaluation.