ఒక చిరు, ఒక శాస్త్రి!

చిరంజీవి ప్రజా అంకిత యాత్రలో అతి తక్కువ రోజుల్లోనే ఆయన శీఘ్ర అస్వస్ధతకు లోనుకావడం ఇప్పుడు మిగితా రాజకీయ పార్టీలకు ప్రధాన ప్రచార అస్త్రంగా మారింది. సినిమాల్లో అయితే ప్రధానమైన రిస్కీ షాట్స్ ను పెద్ద హీరోల మీద కాకుండా వారి డూప్ ల మీద చిత్రీకరించడం మామూలే. చిరంజీవి వారం రోజుల్లోపే గొంతు నొప్పి, వెన్ను నొప్పిలతో ప్రజా అంకిత యాత్రను విరమించడాన్ని ఒక దిన పత్రిక ఎడిటర్ తన దైన శైలిలో దుయ్యబట్టారు. సినిమాల్లో డూప్ లను పెట్టుకుని రిస్కీ షాట్స్ తీయించుకునే హీరోలు ఎండల్లో పామర జనం మధ్య తిరగకుండా ప్రచార వాహనం ముందు డూప్ ను నిలబెట్టి, రికార్డు చేసిన తన వాయిస్ ను ఇవ్వవచ్చు కదా అన్నది ఆ సంపాదక శాస్త్రి గారి వ్యంగ్యం.

నిజానికి ఒక సామాజిక, రాజకీయ మార్పు కోసం ఎవరు ముందుకు వచ్చినా సహృదయంతో ఆహ్వానించాల్సిన సంపాదకులు తమ యాజమాన్యాలను మెప్పించిడం కోసం ఇటువంటి వేషాలు వేస్తున్నారని అనుకోవడంలో తప్పులేదు. ముందు కొత్తదనాన్ని కోరుకోవాలి. అందువల్ల ప్రస్తుత వ్యవస్ధ కంటే ఎక్కువగా మేలు జరుగుతుందనుకుంటే సామాజిక బాధ్యతగా ఆహ్వానం పలకాలి. కానీ శుభం పలకరా బాబూ అంటే "పెళ్ళి కూతురు ముండ" అంటే ఎలా?

నగరంలోని ప్రముఖ వస్త్ర దుకాణాల ముందు మాస్క్ లు వేసుకుని ఇద్దరు ముగ్గురు రోజు వారీ కూలీకి ఎటువంటి డ్యాన్సులు వేయడానికైనా సిద్ధమవుతుంటారు. ఎవరో ఒకరి భుజంపై చొప్పదంటు విల్లు పెట్టి వ్యంగ్య బాణాలు వేయాలనుకునే సంపాదక శాస్త్రులు కొంచెం ఆలోచించాలి. ఈరోజు గడవగానే సరిపోదు, ఈ జన్మ ఎలా సునాయాశంగా గడిచిపోవాలో ఆలోచించాలి.