గడ్డం రాఘవేంద్రకు ఇక అడ్డమేమి?

దర్శకేంద్రుడు రాఘవేంద్రరావు ఎంతో ప్రతిష్టాత్మకంగా రూపొందించిన సినీ ప్లెక్స్ ధియోటర్స్ పై వివాదం కొనసాగుతున్న సంగతి తెలిసిందే. ఎన్టీఆర్ ముఖ్యమంత్రిగా ఉన్నప్పుడు స్టూడియో నిర్మాణం కోసం ప్రభుత్వం నుండి తీసుకున్న స్ధలంలో ఆయన మల్టీ ప్లెక్స్ లు కట్టేసారు. అయితే పరిశ్రమ అభివృధ్ది చెందాలని స్టూడియో కట్టుకోమని ప్రభుత్వం ఇచ్చిన స్ధలంలో వాణిజ్యపరమైన సినిమా ధియోటర్స్ కట్టడం అన్యాయమని అప్పట్లో కాంగ్రెస్ శాసన సభ్యుడు స్వర్గీయ పి.జనార్ధన రెడ్డి కోర్టు కెక్కారు. ఆ తర్వాత ఏం సెటిల్ మెంట్ జరిగిందో కాని ఆ కేసును ఉపసంహరించుకున్నారు. ఈ లోగా తెలంగాణ రాస్ట్ర సమితి శాసన సభ్యుడు హరీష్ రావు రాఘవేంద్రరావు పై మళ్ళీ ఇదే మ్యాటర్ పై న్యాయస్ధానాన్ని ఆశ్రయించారు.

హైదరాబాద్ లోని షేక్ పేటలో అత్యంత విలువైన 2.20 ఎకరాల భూమిని రికార్డింగ్, రీ-రికార్డింగ్, డబ్బింగ్, ఎడిటింగ్, అవుట్ డోర్ యూనిట్లు తదితరాల నిర్మాణానికి కేటాయించారని వాటికి బదులుగా అక్కడ వాణిజ్య సముదాయాన్ని నెలకొల్పటాన్ని సవాలు చేస్తూ టీఆర్ ఎస్ నేత టి.హరీష్ రావు పిటీషన్ వేసారు. జస్టిస్ టి.మీనాకుమారి, జస్టిస్ జి.భవాని ప్రసాద్ లతో కూడిన డివిజన్ బెంచ్ విచారణ జరిపింది. దాంతో రాఘవేంద్రరావుకి, సంగీత దర్శకుడు చక్రవర్తిలకు హైకోర్టు నోటీసులు జారి చేసింది. అయితే మళ్ళీ ఆ కేసు వెనక్కి వెళ్ళే అవకాశముందంటున్నారు. ఎందుకంటే టీఆర్ ఎస్..తెలుగుదేశం మహాకూటమిలో చేరింది కాబట్టి అని వినపడుతోంది. హరీష్ రావు..కేసీఆర్ కి సన్నిహితుడు. రాఘవేంద్రుడు...తెలుగుదేశం అధినేత చంద్రబాబుకి సన్నిహితుడు. విశ్లేషకుల అంచనా ప్రకారం ఈ కొత్త స్నేహం ఎఫెక్టుతో ఆ కేసుని విత్ డ్రా చేసుకునే అవకాశం ఉందంటున్నారు. అలా జరిగితే రాఘవేంద్రడుకు పూర్తి స్ధాయి ఊరట లభించినట్లే.