బాబుకు ఇక్కడా అక్కడా బాగా కలిసొస్తుంది

By Srinivas

Published: Wednesday, December 14, 2011, 14:41 [IST]

తెలుగుదేశం పార్టీ అధినేత నారా చంద్రబాబు నాయుడుకు కలిసొస్తున్నట్గుగా ఉంది. ఇటీవల కొద్దికాలం వరకు ఉక్కిరి బిక్కిరి అయిన చంద్రబాబు క్రమంగా తేరుకుంటున్నారు. ఓ వైపు హైకోర్టు తన ఆస్తుల కేసు విచారణను తాత్కాలికంగానైనా నిలిపి వేయడం, మరోవైపు తెలంగాణలో పార్టీ క్రమంగా కోలుకుంటుండటం బాబుతో పాటు టిడిపి క్యాడర్‌లో ఉత్సాహాన్ని నింపుతోంది. ఇటీవలి వరకు బాబు పరిస్థితి ముందు చూస్తె నుయ్యి వెనుక చూస్తే గొయ్యి అన్నం చందంగా ఉండేది. తెలంగాణ సాధనలో భాగంగా జరిగిన సకల జనుల సమ్మె కారణంగా టిడిపి నేతలు ఆ ప్రాంతంలో అడుగు పెట్టేందుకే సాహసించలేక పోయారని చెప్పవచ్చు.

అయితే వారికి పోలవరం అంశం బాగా కలిసి వచ్చి కెసిఆర్‌ను ఇరుకున పెట్టేశారు. అలాగే విజయమ్మ తన ఆస్తులపై కోర్టుకు వెళ్లడం, హైకోర్టు సిబిఐ విచారణకు ఆదేశించడం టిడిపికి మింగుడు పడలేదు. అయితే సుప్రీం సూచనల మేరకు బాబు అండ్ కో వాదనలు విన్న కోర్టు తాత్కాలికంగా విచారణ నిలిపేసి బాబుకు ఊపిరి తీసుకునే వెసులు బాటు కల్పించింది. ఆస్తులపై అంతిమ తీర్పు కూడా తమకే అనుకూలంగా వస్తుందని టిడిపి విశ్వాసంతో ఉంది. అదే సమయంలో బుధవారం అదిలాబాద్‌లో ప్రారంభమైన బాబు యాత్రకు ఎలాంటి అడ్డంకులు లేకపోవడం గమనార్హం. దీంతో కోర్టు కేసు వీగిపోతే బాబుకు ఇమేజ్ మరింత పెరుగుతుందని అప్పుడు ఇటు తెలంగాణలో అటు సీమాంధ్రలో ఎలాంటి సమస్యలు ఉండవని టిడిపి వర్గాలు భావిస్తున్నాయి.

Published On December 14, 2011