చిరంజీవితో వైయస్ జగన్‌కు పోలికా?

చిరంజీవి ప్రజారాజ్యం పార్టీకి పట్టిన గతే వైయస్ జగన్ వైయస్సార్ కాంగ్రెసు పార్టీకి పడుతుందని తెలుగుదేశం పార్టీ అధ్యక్షుడు నారా చంద్రబాబు నాయుడు నమ్మించే ప్రయత్నం చేస్తున్నారు. పులివెందుల, కుప్పం మినహా అన్ని స్థానాలనూ ప్రజారాజ్యం పార్టీ గెలుచుకుంటుందని ప్రజారాజ్యం పార్టీని పెట్టినప్పుడు మీడియా ఊదరగొట్టిందని, అయితే అలాంటిదేమీ జరగలేదని, వైయస్సార్ కాంగ్రెసు పార్టీ విషయంలో కూడా అదే విధమైన ప్రచారం సాగిస్తున్నారని, చిరంజీవికి పట్టిన గతే వైయస్ జగన్‌కు పడుతుందని ఆయన అంటున్నారు.

అయితే, చిరంజీవితో వైయస్ జగన్మోహన్ రెడ్డిని పోల్చవచ్చా అనేది అసలు వివాదం. చిరంజీవి పార్టీ పెట్టడం గానీ, ఆయన పార్టీని నడిపిన తీరు గానీ వైయస్ జగన్ పార్టీకి వర్తించవు. ఎన్నికల రాజకీయాలు తెలియనివారు చాలా మంది చిరంజీవి చుట్టూ అప్పట్లో ఉన్నారు. అలాగే, వివిధ అంశాలపై ఆయన నిర్దిష్టమైన ప్రకటనలు చేయలేదు. అన్నింటినీ సాధారణీకరిస్తూ పోయారు. మరీ ముఖ్యంగా ఓట్లు వేయించుకునే పటిష్టమైన రాజకీయ యంత్రాంగాన్ని ఆయన ఏర్పాటు చేసుకోలేకపోయారు. పైగా, దివంగత నేత వైయస్ రాజశేఖర రెడ్డి వ్యూహాలు అప్పుడు పకడ్బందీగా పనిచేశాయి. ఈ స్థితిలో చిరంజీవి సరిగా సీట్లు సాధించలేకపోయారు. జగన్‌కు అలాంటి పరిస్థితి ఉందా, ఏమో. వచ్చే 18 స్థానాల ఉప ఎన్నికల ఫలితాలు జగన్ భవిష్యత్తును తేల్చివేస్తాయని మాత్రం చెప్పవచ్చు.