పవన్ కళ్యాణ్ వ్యాఖ్యలకు కాంగ్రెస్ నిరసన

హైదరాబాద్: నిన్న పవన్ కళ్యాణ్ కాంగ్రెస్ నాయకులపై చేసిన వ్యాఖ్యలకు నిరసనగా బుధవారం మధ్యాహ్నం యువజన కాంగ్రెస్ నాయకులు ప్రజారాజ్యం కార్యాలయం ఎదుట ధర్నా చేశారు. ఈ సందర్భంగా ప్రజారాజ్యం కార్యకర్తలకు, యువజన కాంగ్రెస్ కార్యకర్తలకు మధ్య ఘర్షణ జరిగింది. పరిస్ధితి ఉద్రిక్తంగా మారడంతో ఇరువర్గాలపై పోలీసులు లాఠీ చార్జి చేయవలసి వచ్చింది.

తమ పార్టీ కార్యాలయం ముందు కాంగ్రెస్ కార్యకర్తలు చేసిన ఆందోళనతో కలత చెందిన పవన్ కళ్యాణ్ నేడు మళ్లీ ముఖ్యమంత్రి రాజశేఖరరెడ్డి మీద, మంత్రి షబ్బీర్ అలీ మీద విమర్శలు గుప్పించారు. "కాంగ్రెస్ నాయకుల పంచెలు ఊడేలా తరిమి కొట్టాలి" అని నిన్న పవన్ కళ్యాణ్ ఇచ్చిన పిలుపు కాంగ్రెస్ వర్గాల్లో తీవ్ర సంచలనం సృష్టించింది. యువజన కాంగ్రెస్ కార్యకర్తల ధర్నాను ప్రజారాజ్యం యువజన విభాగం కార్యకర్తలు ఎదుర్కొన్నారు. రౌడీ రాజ్యం అంతం కావాలని వారు నినాదాలు చేశారు.