ప్రధాని రేసులో లేను: బాబు

న్యూఢిల్లీ: ప్రధాని పదవి ఒక్కటే ఉందని, అయితే ఆ ఒక్క పదవిని పలువురు ఆశిస్తున్నారని తెలుగుదేశం పార్టీ అధినేత నారా చంద్రబాబు నాయుడు అన్నారు. అయితే ఏకాభిప్రాయంతోనే మూడో కూటమి ప్రధాని అభ్యర్థిని ఎంపిక చేస్తామని ఆయన బుధవారం మీడియా ప్రతినిధులతో అన్నారు. తాను మాత్రం ఆ రేసులో లేనని స్పష్టం చేశారు. ఎప్పటినుంచో ఈ పదవిని ఆశిస్తున్న మాయావతికే మద్దతు ఉంటుందా అని అడిగిన ప్రశ్నకు సమాధానంగా ఆయన పై వ్యాఖ్యలు చేశారు. ఒక్కరికే పదవి దక్కుతుందన్న విషయం గుర్తించి ఏకాభిప్రాయం మేరకు నడుచుకుంటే ఎలాంటి గొడవలు తలెత్తవని అన్నారు.

వామపక్షాలతో కలిసి చంద్రబాబు జాతీయ స్థాయిలో మూడో ప్రత్యామ్నాయాన్ని బలోపేతం చేయడానికి ప్రయత్నిస్తున్న విషయం తెలిసిందే. మూడో కూటమిలోకి బిఎస్పీ నేత మాయావతిని కూడా ఆహ్వానిస్తున్నారు. మూడో కూటమి తన పేరును ప్రధాని అభ్యర్థిగా ప్రకటించాలని మాయావతి పట్టుబడుతున్నట్లు వార్తలు వచ్చాయి. అయితే ఎన్నికల తర్వాతనే ప్రధాని అభ్యర్థిపై చర్చిస్తామని చెప్పి ఆమె ఆ వ్యాఖ్యలకు తెర దించారు.