చంద్రబాబు 'మహా' సర్దుబాటు

హైదరాబాద్: మహాకూటమి పార్టీల మధ్య సీట్ల పంపకం పూర్తయింది. దీంతో మహాకూటమిలో కొద్ది కాలంగా సాగుతున్న హైడ్రామాకు తెర పడింది. తిరుగుబాటు అభ్యర్థులుగా రంగంలోకి దిగిన తమ నామినేషన్లు ఉపసంహరించుకోవాలని తెలుగుదేశం పార్టీ అధ్యక్షుడు నారా చంద్రబాబు నాయుడు తన పార్టీ నాయకులకు సూచిస్తారు. తెలంగాణ రాష్ట్ర సమితి (తెరాస) వామపక్షాలకు కేటాయించిన హుస్నాబాద్, వరంగల్ (తూర్పు) శాసనసభా స్థానాల్లో తెరాస అభ్యర్థులు నామినేషన్లు ఉపసంహరించుకుంటారు. సోమవారం రాత్రి చంద్రబాబు, తెరాస అధ్యక్షుడు కె.చంద్రశేఖర రావుకు మధ్య జరిగిన చర్చల్లో ఈ మేరకు ఒప్పందం కుదిరినట్లు సమాచారం.

సిపిఎంకు 15, సిపిఐ 14 శాసనసభా స్థానాలను కేటాయించారు. మొదటి సారి మిత్రపక్షాలకు అత్యధికంగా 73 స్థానాలు కేటాయించామని చంద్రబాబు మీడియా ప్రతినిధులతో చెప్పారు. తాము 211 స్థానాలకు పోటీ చేస్తున్నట్లు ఆయన చెప్పారు. కాగా, మహాకూటమి నేతలు మంగళవారం నాడు చంద్రబాబు నివాసంలో సమావేశం కానున్నారు. ప్రచారానికి సంబంధించిన వ్యూహాన్ని ఈ సమావేశంలో ఖరారు చేస్తారని తెలుస్తోంది.