వైయస్ జగన్ పై పవన్ ధ్వజం

విశాఖపట్నం: ముఖ్యమంత్రి డాక్టర్ వైయస్ రాజశేఖర్ రెడ్డి కుమారుడు వైయస్ జగన్మోహన్ రెడ్డి ఒక పత్రికను, ఒక న్యూస్ చానెల్ ను ప్రారంభిస్తే రాష్ట్రమంతా అభివృద్ధి చెందినట్లా అని యువరాజ్యం అధినేత పవన్ కళ్యాణ్ ప్రశ్నించారు. మిగిలినవారు సంపన్నులు కావాల్సిన అవసరం లేదా అని ఆయన అడిగారు. విశాఖపట్నంలో జరిగిన ప్రచారసభలో బుధవారం సాయంత్రం ఆయన ప్రసంగించారు. ముఖ్యమంత్రి వైయస్ రాజశేఖర రెడ్డిపై, తెలుగుదేశం పార్టీ అధ్యక్షుడు నారా చంద్రబాబు నాయుడిపై ఆయన విమర్శల వర్షం కురిపించారు.

కలర్ టీవీలు ఇస్తే పేదరికం పోతుందా, నగదు బదిలీ పథకంతో రాష్ట్ర ఆర్థిక వ్యవస్థను దివాలా తీస్తారా అని ఆయన చంద్రబాబును అడిగారు. తమ ప్రజారాజ్యం పార్టీ రాత్రికి రాత్రి అద్భుతాలు సృష్టిస్తామని చెప్పదని, పదేళ్లలో అన్ని రంగాల్లో అభివృద్ధి చేసి చూపిస్తామని ఆయన అన్నారు. అభివృద్ధి సాధించనప్పుడు ప్రజలు నిలదీయవచ్చునని ఆయన అన్నారు.