రాజశేఖర్ కు చేదు అనుభవం

విజయవాడ: కాంగ్రెస్‌ ఎన్నికల ప్రచారంలో తలమునకలవుతున్న సినీ నటుడు రాజశేఖర్ కు కృష్ణా జిల్లా జగ్గయ్యపేటలో కాంగ్రెస్‌ నాయకుని ఇంట్లోనే చేదు అనుభవం ఎదురైంది. పార్టీ ఎన్నికల ప్రచారానికి భార్య జీవితతో కలిసి వచ్చిన ఆయన ముందుగా మాజీ వైస్‌ ఛైర్మన్‌ నూకల కుమారరాజ ఇంట్లో మీడియా సమావేశం ఏర్పాటు చేద్దామనుకున్నారు. కానీ ఆ దంపతుల ప్రణాళిక తల్లకిందులైంది. కుమారరాజా ఇంట్లో చిరంజీవిని విమర్శించవద్దంటూ పక్కనెవరో రాజశేఖర్‌కు సూచించారు. దీంతో ఆయనకు కోపం వచ్చింది. అక్కడ ఉండలేక జీవితతో అరగంటలో వస్తానంటూ చెప్పి బయటకు వచ్చారు. తానే స్వయంగా కారు నడుపుతూ జగ్గయ్యపేట పట్టణంలోకి వెళ్లారు. రాజశేఖర్‌ చర్యలకు కలవరపడ్డ జీవిత పలుమార్లు ఫోన్‌లో ఆయనను సంప్రదించారు. కంగారుపడుతున్న ఆమెను సామినేని విమలాభాను, కుమారరాజా దంపతులు సముదాయించారు.

వెనక్కి తిరిగివచ్చిన రాజశేఖర్‌ ఆగకుండానే మళ్లీ ముక్త్యాల రోడ్డువైపు వెళ్లిపోవడంతో మీడియా ప్రతినిధులు ఆయనను అనుసరించారు. ఉదయభాను సోదరీమణులు జీవితను మరో కారులో ఎక్కించుకొని అనుసరించారు. బైపాస్‌రోడ్డు వద్ద ఆగిన రాజశేఖర్‌ మీడియా ప్రతినిధులతో మాట్లాడుతుండగా జీవిత అక్కడికి చేరుకున్నారు. ఇంతలో హుటాహుటిన వచ్చిన ఉదయభాను ఆయనను బుజ్జగించే ప్రయత్నం చేశారు. ప్రచారంలో పాల్గొనకుండానే వెళ్లిపోయారు. అవినీతిపై పోరాడతానంటూ రాజకీయాల్లోకి వచ్చిన చిరంజీవి సీట్ల పంపకంలోనే డబ్బులు దండుకున్నారని సినీనటుడు రాజశేఖర్‌ తీవ్రంగా విమర్శించారు.