ఎల్టీటిఇపై అలా అనలేదు: కరుణ

చెన్నై: ఎల్టీటిఇని తాను టెర్రరిస్టు సంస్థ కాదని అనలేదని తమిళనాడు ముఖ్యమంత్రి కరుణానిధి అన్నారు. ఎల్టీటిఇ అగ్రనేత ప్రభాకరన్ తనకు మంచి మిత్రుడని ఆదివారంనాడు చెప్పిన ఆయన సోమవారం మాట మార్చారు. శ్రీలంకలోని తమిళ ప్రజల బాధల పట్లనే తాను సానుకూలంగా మాట్లాడానని ఆయన అన్నారు. ఎల్టీటిఇ టెర్రరిస్టు గ్రూపుగా ప్రారంభం కాలేదని, ఆ తర్వాత టెర్రరిస్టు గ్రూపుగా మారిందని ఆయన అన్నారు.

రాజీవ్ గాంధీని హత్య చేసిన ఎల్టీటిఇని క్షమించలేమని ఆయన అన్నారు. శ్రీపెరంబుదూర్ సంఘటనను మర్చిపోదామని కూడా తాను అనలేదని ఆయన స్పష్టం చేశారు.ఎల్టీటిఇ లక్ష్యం మంచిదేనని, అయితే దాని సాధనకు అది ఎంచుకున్న మార్గమే సరైంది కాదని ఆయన అన్నారు. తమిళనాడులో డిఎంకె ప్రభుత్వానికి మద్దతిస్తున్న కాంగ్రెసు పార్టీ కరుణానిధి ఆదివారం మాట్లాడిన వెంటనే ప్రతిస్పందించింది. అయితే కరుణానిధిపై తీవ్రమైన విమర్శలు చేయలేదు. కాంగ్రెసు ఇరకాటంలో పడడంతో కరుణానిధి తాను చేసిన ప్రకటనపై సోమవారం వివరణ ఇచ్చారు.