రాహుల్ ను అలా చూడాలని ఉంది: జయప్రద

న్యూఢిల్లీ : రాహుల్ గాంధీని ప్రధానిగా చూడాలని ఉందని ఒకనాటి అందాల తార, నేటి సమాజ్ వాది పార్టీ ఎంపీ జయప్రద అన్నారు. తాను ప్రత్యర్ధి పార్టీలో ఉన్నా ఆమె రాహుల్‌ గాంధీని ప్రశంశించడానికి ఏ మాత్రం సంకోచించలేదు. రాహుల్‌ గాంధీ ప్రజలతో మమేకయ్యే విధానం తనకు ఎంతో నచ్చిందని జయప్రద అంటోంది. అందుకే రాహుల్‌గాంధీని ప్రధానిగా చూడాలనుకుంటున్నానని తెలిపింది.

జయప్రద మొదట తెలుగుదేశం పార్టీలో పనిచేశారు. ఆ పార్టీ తరఫున రాజ్యసభ సభ్యత్వం పొందారు. ఆ తర్వాత చంద్రబాబుతో విభేదాల కారణంగా ఆమె సమాజ్ వాది పార్టీలో చేరారు. సమాజ్ వాది పార్టీ తరఫున ఆమె రెండు సార్లు ఉత్తరప్రదేశ్ లోని రామ్ పూర్ నియోజకవర్గం నుంచి ఎంపీగా ఎన్నికయ్యారు. ఆమె ఇప్పుడు రాహుల్ గాంధీకి అనుకూలంగా వ్యాఖ్యానించడం చర్చనీయాంశమైంది.