దొరికిన రాజ్యసభ డిప్యూటీ చైర్మన్ కారు

న్యూఢిల్లీ: చోరీకి గురైన రాజ్యసభ డిప్యూటీ చైర్మన్ కె. రహ్మాన్ ఖాన్ పైలట్ కారు దొరికింది. ఆ కారును రాంగ్ పూరా ప్రాంతంలో వదిలేసి వెళ్లినట్లు పోలీసులు మంగళవారం చెప్పారు. కారును పోలీసులు స్వాధీనం చేసుకున్నారు. కారుకు ఉన్న రేడియో ట్యాగ్ పార్లమెంటులోకి అనుమతి ఇస్తుంది. కారు డ్రైవర్ నిజరంజన్ మొహంతీ నివాసం నుంచి ఈ కారు చోరీకి గురైంది.

ఆగంతుకుడు కారును దొంగిలించుకుపోయాడు. నిరంజన్ మొహంతీ దాన్ని వెంబడించినప్పటికీ ఫలితం లేకపోయింది. ప్రముఖ స్థలాలకు వెళ్లడానికి అనుమతిచ్చే నాలుగైదు స్టిక్కర్లు ఆ కారుకు ఉన్నాయి. విధులు పూర్తి చేసుకున్న తర్వాత డ్రైవర్ ఆదివారం రాత్రి పొద్దు పోయిన తర్వాత కారును తన ఇంటికి తీసికెళ్లాడు. సోమవారం అది చోరీకి గురైంది.