నా పెళ్లి తేదీ ఇంకా రహస్యమే: శిల్పా శెట్టి

ముంబై: రాజ్ కుంద్రాతో తన వివాహం తేదీ ఖరారైందని, ఈ తేదీపై అందరికీ ఆసక్తి ఉన్న విషయం తనకు తెలుసునని, అయితే దాన్ని ఇప్పుడే వెల్లడించదలుచుకోలేదని బాలీవుడ్ నటి శిల్పా శెట్టి అన్నారు. త్వరలోనే తన సోదరి సమక్షంలోనే ఆ తేదీని వెల్లడిస్తానని ఆమె చెప్పారు. రాజ్ కుంద్రాతో శనివారం శిల్పాశెట్టి నిశ్చితార్థం జరిగింది.

సమిత ప్రస్తుతం కలర్స్ బిగ్ బాస్ 3 రియాల్టీ షోలో పాల్గొంటోంది. మరో పది మందితో పాటు సమిత ఒక గదిలో ఉంది. బాహ్య ప్రపంచంతో ఆమెకు సంబంధం లేకుండా పోయింది. తాను తన సోదరిని మిస్ అవుతున్నట్లు శిల్పా శెట్టి అన్నారు. తనకు ఒక వైపు ఆనందం, మరో వైపు విషాదం ఉందని, రాజ్ కుంద్రాతో వివాహం నిశ్చితం కావడం సంతోషమైతే, ఈ సంతోష సమయంలో తన సోదరి పక్కన లేకపోవడం విషాదమని ఆమె అన్నారు. సమితకు తన నిశ్చితార్థం గురించి కూడా తెలియదని ఆమె అన్నారు.