ఎవరు ఓడినా తెలగాణవాదం పోదు: పొన్నం ప్రభాకర్

కరీంనగర్: తెలంగాణలోని 12 శాసనసభ నియోజకవర్గాలకు జరిగే ఉప ఎన్నికల్లో ఏ పార్టీ గెలిచినా, ఏ పార్టీ ఓడినా తెలంగాణ వాదం మాసిపోదని కాంగ్రెసు పార్లమెంటు సభ్యుడు పొన్నం ప్రభాకర్ అన్నారు. ఉప ఎన్నికల్లో తెలంగాణ రాష్ట్ర సమితి (తెరాస) ఓడినా కూడా తెలంగాణవాదం ఆగదని, తెరాస గెలిచినా, ఓడినా దాని ప్రభావం తెలంగాణవాదంపై పడదని ఆయన బుధవారం మీడియా ప్రతినిధుల సమావేశంలో అన్నారు.

ఊప ఎన్నికల్లో తెలంగాణవాదం ఎజెండాగా పార్టీ ముందుకు పోవద్దని, అభివృద్ధి ఎజెండాతోనే ఉప ఎన్నికల్లో ప్రచారం సాగించాలని తమ పార్టీ అనంతపురం పార్లమెంటు సభ్యుడు అనంత వెంకటరామిరెడ్డి చేసిన సూచనను ఆయన వ్యతిరేకించారు. అనంత వెంకటరామిరెడ్డి వాదన సరైంది కాదని ఆయన అన్నారు. తెలంగాణలో జరిగే ఉప ఎన్నికలపై తెలంగాణేతర మాట్లాడవద్దని తెలంగాణేతర ప్రాంతాల పార్లమెంటు సభ్యులను, నాయకులను కోరుతామని ఆయన చెప్పారు.