అరెస్టు కాదు, నన్ను కిడ్నాప్ చేశారు: విజయశాంతి

హైదరాబాద్‌: పోలీసులు తనను అరెస్టు చేయలేదని, దాదాపుగా కిడ్నాప్ చేశారని తెలంగాణ రాష్ట్ర సమితి (తెరాస) పార్లమెంటు సభ్యురాలు విజయశాంతి వ్యాఖ్యానించారు. తనను అరెస్టు చేసిన సందర్భంలో పోలీసులు వ్యవహరించిన తీరుపై ఆమె సోమవారం సాయంత్రం ఎన్నికల సంఘానికి ఫిర్యాదు చేశారు. పార్లమెంటు సభ్యురాలిననే ప్రోటో కాల్ పాటించలేదని, మహిళననే గౌరవం కూడా ఇవ్వలేదని ఆమె ఆరోపించారు. తనను అరెస్టు చేయాలని ఎన్నికల సంఘం గానీ హోం మంత్రి గానీ ఆదేశించలేదని, పోలీసులే అత్యుత్సాహం ప్రదర్శించారని ఆమె అన్నారు.

తనను అరెస్టు చేసినప్పుడు అనుచితంగా ప్రవర్తించిన పోలీసు ఉన్నతాధికారులను సస్పెండ్ చేయాలని ఆమె డిమాండ్ చేశారు. ప్రభుత్వం తనకు క్షమాపణ చెప్పాలని ఆమె కోరారు. తనను జైల్లో పెట్టాలని ప్రభుత్వం కుట్ర చేస్తోందని ఆమె ఆరోపించారు. తెలంగాణకు అడ్డొస్తే అడ్డంగా నరికేయండనేది తెలంగాణ నినాదమని, అది ఈనాటిది కాదని ఆమె చెప్పారు.