వైయస్ జగన్ మరో బలప్రదర్శన: 18వ తేదీన హైదరాబాదులో దీక్ష

హైదరాబాద్: మాజీ పార్లమెంటు సభ్యుడు వైయస్ జగన్ మరోసారి బలప్రదర్శనకు దిగుతున్నారు. ఈసారి హైదరాబాదును వేదికగా ఎంచుకున్నారు. తన వైపు వస్తున్న శాసనసభ్యులను కట్టడి చేయడానికి ముఖ్యమంత్రి కిరణ్ కుమార్ రెడ్డి ప్రయత్నాలు ముమ్మరం చేసిన నేపథ్యంలో జగన్ ఈ దీక్షకు దిగుతున్నారు. ఫీజు రీయింబర్స్‌మెంట్ నిధుల విడుదలలో ప్రభుత్వం వైఖరికి నిరసనగా జగన్ఈనెల 18వ తేదీన హైదరాబాద్‌లో దీక్ష చేపట్టనున్నట్లు కాంగ్రెసు కిసాన్ సెల్ మాజీ అధ్యక్షుడు గట్టు రామచంద్ర రావు తెలిపారు.

గురువారం ఆయన ఇక్కడ మీడియా సమావేశంలో మాట్లాడారు. ఫీజు బకాయిలకు ఆత్మహత్య చేసుకున్న గుండె వరలక్ష్మి కుటుంబాన్ని వైఎస్ జగన్ ఎల్లుండి పరామర్శించనున్నట్లు తెలిపారు. జగన్ చేపట్టబోయే ఈ దీక్షలో విద్యార్థులు, విద్యార్థుల తల్లిదండ్రులు పాల్గొన్నాలని గట్టు రామచంద్రరావు కోరారు. జగన్ దీక్ష నేపథ్యంలో వరలక్ష్మి ఆత్మహత్య ఉదంతంపై సాక్షి మీడియా విస్తృతంగా ప్రచారాన్ని సాగిస్తోంది.

తెలుగు మ్యాట్రిమోనిలో మీకు నచ్చిన జీవిత భాగస్వామి ఎంపికలు - రిజిస్ట్రేషన్ ఉచితం!