పార్టీని కాపాడుకోవడానికే ఇలా: తెలంగాణ అంశంపై చంద్రబాబు

By Srinivas

Published: Tuesday, February 22, 2011, 16:10 [IST]

హైదరాబాద్: రాష్ట్రంలోని అన్ని పార్టీలు వారి వారి పార్టీలను కాపాడుకోవడానికి వివిధ ప్రయత్నాలు చేస్తున్నాయని, అయితే తెలుగుదేశం మాత్రం ఏ ప్రయత్నం చేసినా రాజకీయం అవుతుందా అని టిడిపి అధినేత చంద్రబాబునాయుడు మంగళవారం ఎన్టీఆర్ ట్రస్ట్ భవన్‌లో ఏర్పాటు చేసిన విలేకరుల సమావేశంలో ప్రశ్నించారు. తెలుగుదేశం పార్టీ పెట్టిందే తెలుగువారి కోసమన్నారు. కేవలం రాష్ట్రంలోని వారి కోసమే కాదని, ప్రపంచంలో ఉన్న తెలుగువారందరికోసం తెలుగుదేశం పార్టీ ఆవిర్భవించిందన్నారు. టిడిపిని అన్ని ప్రాంతాల్లో కాపాడుకోవాల్సిన బాధ్యత అధ్యక్షుడిగా నాకు ఉన్నదని, అదే ఉద్దేశ్యంతో మేం ముందుకు పోతున్నామన్నారు.

అన్ని పార్టీలు వారి వారి పార్టీలను కాపాడుకోవడానికి ప్రయత్నాలు చేస్తున్నాయన్నారు. మేం కూడా మా టిడిపి పార్టీని కాపాడుకోవడానికి ప్రయత్నాలు చేస్తే తప్పు ఎలా అవుతుందన్నారు. పార్టీని కాపాడుకోవడానికి అన్ని ప్రాంతాల ప్రజలతో మమేకమవుతామని చెప్పారు. టిఆర్ఎస్, కాంగ్రెసు, ప్రజారాజ్యం పార్టీలు విలీనం అయి పార్టీలను బలోపేతం చేసుకోవడం రాజకీయం కాదు, జగన్, టిఆర్ఎస్ పరస్పరం సహకరించుకోవడం రాజకీయం కాదు కానీ తెలుగువారి కోసం పుట్టిన టిడిపి పార్టీని కాపాడుకోవడానికి ప్రయత్నాలు చేస్తే రాజకీయం అవుతుందా అని అన్నారు.

Published On February 22, 2011