వైయస్ జగన్ ఎఫెక్ట్: వైయస్ఆర్ పార్టీ పేరుకు నిండుతున్న కల్లుకుండలు

By Srinivas

Published: Monday, April 18, 2011, 11:05 [IST]

నల్గొండ: మాజీ పార్లమెంటు సభ్యుడు వైయస్ జగన్మోహన్ రెడ్డికి చెందిన వైయస్ఆర్ కాంగ్రెసు పార్టీ పేరు చెబితే తాటి చెట్టు కూడా ఫ్లాటవుతోందంట. జగన్‌కు మద్దతుగా తాటి చెట్టు కుండను నిండుగా నింపుతోందంట. ఈ విచిత్రం నల్గొండ జిల్లా ఖుతుబ్ షాపురంలో చోటు చేసుకుంటోంది. కడప జిల్లాలోలాగే ఆ గ్రామంలో కూడా జగన్ అభిమానులు పలువురు ఉన్నారు. అయితే రామయ్య అనే కల్లుగీత కార్మికుడు జగన్ కడప పార్లమెంటు, పులివెందుల శాసనసభ ఉప ఎన్నికలలో గెలవాలని కోరుకుంటున్నారు. అయితే తన కోరికను తనకు ఉన్న తాటిచెట్లకు పేరు పెట్టి ఎవరు గెలుస్తారో నిర్ణయించుకోవాలనుకున్నాడో ఏమో.

రామయ్య తన తాటి చెట్లలో ఓ దానికి వైయస్ఆర్ కాంగ్రెసు పార్టీ అని, మరో దానికి కాంగ్రెసు పార్టీ అని నామకరణం చేశాడు. అయితే ఆ రెండు చెట్లలో వైయస్ఆర్ కాంగ్రెసు పార్టీ అని పేరు పెట్టిన తాటి చెట్టుకు కట్టిన కుండ పూర్తిగా నిండగా, కాంగ్రెసు అని పేరు పెట్టిన తాటి చెట్టుకు కుండా మాత్రం పావు వంతు కూడా నిండటం లేదు. దీంతో గ్రామ ప్రజలు ఆశ్చర్యానికి లోనవుతున్నారు. జగన్‌కు తాటి చెట్లు కూడా మద్దతు పలుకుతున్నాయని అంటున్నారు. జగన్ కడప ఉప ఎన్నికల్లో తప్పకుండా గెలుస్తారని వారు ఆశాభావం వ్యక్తం చేస్తున్నారు. అయితే జగన్‌పై అభిమానంతో తనకు తాటి కల్లు ఎక్కువగా వచ్చే చెట్టుకు జగన్ పార్టీ పేరు, తక్కువగా వచ్చే చెట్టుకు కాంగ్రెసు పార్టీ పేరు పెట్టాడనే మాటనూ కాదనలేము.

Published On April 18, 2011