చంద్రబాబు రాజకీయ వారసుడు నారా లోకేష్, వ్యూహం రెడీ?

By Pratap

Published: Wednesday, April 20, 2011, 9:58 [IST]

హైదరాబాద్: ఎన్ని ఆటంకాలు ఎదురైనా తన కుమారుడు నారా లోకేష్‌నే తన రాజకీయ వారసుడిగా నిలబెట్టాలనే పట్టుదలతో తెలుగుదేశం పార్టీ అధ్యక్షుడు నారా చంద్రబాబు నాయుడు ఉన్నట్లు కనిపిస్తున్నారు. చంద్రబాబు బుధవారం తన 62వ జన్మదినం జరుపుకుంటున్నారు. ఈ సందర్భంగా వెలిసిన కొన్ని ఫ్లెక్సీలు నారా లోకేష్ ప్రాధాన్యాన్ని తెలియజేస్తున్నాయి. నారా లోకేష్ ఫొటోలు వాటిలో అత్యంత ప్రధానంగా చోటు చేసుకున్నాయి. నెమ్మదిగా నారా లోకేష్‌ను తన స్థానంలో కూర్చోబెట్టడానికి చంద్రబాబు రచించిన వ్యూహంలో భాగంగానే ఆ ఫ్లెక్సీలు వెలుగులోకి వచ్చినట్లు తెలుస్తోంది.

ఫ్లెక్సీల్లో స్వర్గీయ ఎన్టీ రామారావు, బాలకృష్ణ చిత్రాలు పైన చోటు చేసుకున్నాయి. వాటి కింద ఓ వైపు చంద్రబాబు ఫొటో, మరో వైపు నారా లోకేష్ ఫొటో ఉన్నాయి. వీటిలో ఎన్టీ రామరావు, బాలకృష్ణ ఫొటోలు చిన్నవిగా ఉన్నాయి. చంద్రబాబు, నారా లోకేష్ ఫొటోలు పెద్దగా ఉన్నాయి. చంద్రబాబు కన్నా నారా లోకేష్ ఫొటో ఎక్కువగా కొట్టొచ్చినట్లు కనిపిస్తోంది. బాలకృష్ణ సహాయంతో తన కుమారుడు నారా లోకేష్‌కు తన రాజకీయ వారసత్వమే కాకుండా స్వర్గీయ ఎన్టీ రామారావు వారసత్వాన్ని కూడా అందించేందుకు చంద్రబాబు వ్యూహం రచించి అమలు చేస్తున్నారని అంటున్నారు.

Published On April 20, 2011