చంద్రబాబుకు ఫోన్ శుభాకాంక్షలు: జూనియర్ ఎన్టీఆర్ దూరమే

హైదరాబాద్: ఏ సందర్భం వచ్చినా తెలుగుదేశం పార్టీ అధ్యక్షుడు, మామయ్య నారా చంద్రబాబు నాయుడి నివాసం వద్ద వాలిపోయే సినీ హీరో జూనియర్ ఎన్టీఆర్ ఇప్పుడు అంత సాన్నిహిత్యం ప్రదర్శించడం లేదనే ప్రచారం జరుగుతోంది. చంద్రబాబుకు ఆయన బుధవారం ఫోన్ చేసి జన్మదిన శుభాకాంక్షలు తెలిపారు. పెళ్లి పనుల్లో జూనియర్ ఎన్టీఆర్ తీరిక లేకుండా ఉండడం వల్ల మాత్రమే చంద్రబాబు నివాసానికి వెళ్లలేకపోయారని చెప్పలేం. పనిలో పనిగా చంద్రబాబు నివాసానికి చేరుకోవడం జూనియర్ ఎన్టీఆర్‌కు అంత కష్టమేమీ కాదు. కానీ ఫోన్‌లో శుభాకాంక్షలు తెలిపారంటే చంద్రబాబుతో ఆయన దూరంగానే ఉంటున్నట్లు అర్థం చేసుకోవచ్చునని అంటున్నారు.

తన పెళ్లి అహ్వాన పత్రికను జూనియర్ ఎన్టీఆర్ తన తండ్రి నందమూరి హరికృష్ణ కలిసి వెళ్లి చంద్రబాబుకు అందించారు. తెలుగుదేశం పార్టీలో సాగుతున్న వారసత్వ పోరుపై హరికృష్ణ గానీ జూనియర్ ఎన్టీఆర్ గానీ ఇప్పటి వరకు ఏమీ మాట్లాడలేదు. ఆ వార్తలను వారు ఖండించలేదు. బాలకృష్ణ మాత్రం బుధవారం వారసత్వ పోరు కేవలం మీడియా సృష్టి అని కొట్టి పారేసే ప్రయత్నం చేశారు. దీన్ని బట్టి బాలయ్య నందమూరి హరికృష్ణను వ్యతిరేకిస్తున్నట్లు అర్థం చేసుకోవచ్చు. మొత్తం మీద, గతంలో మాదిరిగా చంద్రబాబుతో జూనియర్ ఎన్టీఆర్ పూర్తిగా కలిసి పనిచేయడానికి సిద్ధంగా లేరని తెలుస్తోంది.

English summary

Cine hero Jr Ntr wishes TDP president N Chandrababu Naidu on phone on the occasion of later's birth day. It shows Jr NTR unhappiness with Chandrababu.