జగన్ సింబల్ కు కష్టాలు: ఫ్యాన్ కంపెనీలతో ఒప్పందాలున్నాయన్న కాంగ్రెసు

By Srinivas

Published: Saturday, May 7, 2011, 11:37 [IST]

హైదరాబాద్: మాజీ పార్లమెంటు సభ్యుడు వైయస్ జగన్మోహన్ రెడ్డి ఫ్యాన్ గుర్తు ఇటు కాంగ్రెసుకు, అటు ఫ్యాన్ కంపెనీలకు కష్టాలు తెచ్చేలా ఉంది. జగన్‌కు ఫ్యాన్ గుర్తు రావడమేమో కానీ కాంగ్రెసు నేతలు ఫ్యాన్ గుర్తు యాడ్‌ను రెండు రోజుల పాటు టీవీలలో కనపడకుండా చేయాలని డిమాండ్ చేస్తున్నారు. కడప ఉప ఎన్నికల బరిలో జగన్, విజయమ్మల గుర్తు ఫ్యాన్ అయినందువల్ల జగన్ కొన్ని ఫ్యాన్ కంపెనీలతో ఒప్పందం కుదుర్చుకొని ఈ రెండు రోజులు ఫ్యాన్ యాడ్స్ ధాటిగా వచ్చేలా ప్రయత్నాలు చేస్తున్నారని అందుకే ఫ్యాన్ కంపెనీల యాడ్స్‌ను రెండు రోజుల పాటు టీవీలలో రాకుండా చూడాలని ఎన్నికల సంఘానికి విజ్ఞప్తి చేసినట్టు ఎమ్మెల్సీ రుద్రరాజు పద్మరాజు చెప్పారు.

రుద్రరాజు మరికొందరు కాంగ్రెసు నేతలు ఎన్నికల అధికారి భన్వర్ లాల్ ను కలిసి ఫ్యాన్ యాడ్స్ ను నిలిపివేసి, ఎన్నికలలో డబ్బు పంపకాలకు అడ్డుకట్ట వేయాలని కోరారు. పోలీసులు జగన్ వర్గం వారిగా వ్యవహరిస్తూ మంత్రులు లేని సమయాలలో వారి ఉన్న గదులలో సోదాలు చేయడాన్ని కూడా ఆయన ఈసి దృష్టికి తీసుకు వెళ్లారు.

Published On May 7, 2011