రామ్‌దేవ్‌పై కేంద్రం తీరు బాధాకరం, దేనికైనా సిద్ధం: అన్నాహజారే

న్యూఢిల్లీ: ప్రముఖ యోగా గురువు బాబా రామ్‌దేవ్‌పై కేంద్రం తీరు చాలా బాధాకరమని ప్రముఖ సంఘ సంస్కర్త అన్నాహజారే బుధవారం ధ్వజమెత్తారు. అర్ధరాత్రి సమయంలో గాంధీ బాటలో ఉద్యమం చేస్తున్న వారిపై పోలీసులు జులుం ప్రదర్శించడం దారుణం అన్నారు. రామ్‌దేవ్ బాబా దీక్షపై కేంద్రం వైఖరి, అవినితీకి వ్యతిరేకంగా అన్నాహజారే న్యూఢిల్లీలోని రాజ్ ఘాట్ వద్ద ఒక్క రోజు నిరాహార దీక్ష చేస్తున్నారు. ఈ సందర్భంగా ఆయన మాట్లాడారు. అహింసా మార్గంలో పోరాడితే ఎవరూ ఏమీ చేయలేరని ఆయన అన్నారు. మహాత్మాగాంధీ ఆదర్శాలను పాటిద్దాం అని ఆయన జాతికి పిలుపునిచ్చారు. అవినీతి విషయంలో పౌర సమాజం విడిపోయినట్లు కేంద్రం అవాస్తవ వార్తలు సృష్టిస్తోందని ఆరోపించారు.

జన్ లోక్‌పాల్ బిల్లుకు కేంద్రం అడ్డంకులు సృష్టిస్తే సహించేది లేదన్నారు. లోక్ పాల్ బిల్లు కోసం ఏ పోరుకైనా సిద్దం అని ప్రకటించారు. స్వచ్ఛమైన లోక్ పాల్ బిల్లే తమ లక్ష్యం అన్నారు. బిల్లును అడ్డుకోవాలని చూస్తే దేశవ్యాప్తంగా ఉద్యమం చేపడతామని హెచ్చరించారు. ప్రజా హక్కులను కేంద్ర ప్రభుత్వం కాలరాస్తోందని ఆరోపించారు.

English summary

Anna Hazare accused central government attitude in the Baba Ramdev's issue. He warned centre that if government will try to obstruct Jan Lokpal Bill they will agitate national wide.