యోగాలో తప్ప నైపుణ్యం లేదు: రామ్‌దేవ్‌పై అన్నాహజారే విమర్శలు

న్యూఢిల్లీ\హరిద్వార్: విదేశాలలో ఉన్న నల్లధానాన్ని వెనక్కి తెప్పించాలన్న ప్రధాన డిమాండుతో ఎనిమిది రోజులుగా నిరాహార దీక్ష చేస్తున్న ప్రముఖ యోగా గురువు బాబా రామ్‌దేవ్‌పై సంఘ సంస్కర్త అన్నా హజారే విమర్శలు గుప్పించారు. బాబా ఇంకా సమస్యలపై పోరాడే స్థితికి ఎదగ లేదన్నారు. ఆయనకు యోగాలో తప్ప మరెందులోనూ నైపుణ్యం లేదని ఆరోపించారు. ప్రభుత్వం మానవతా దృక్ఫథంతో బాబా దీక్షను విరమింప చేయాలని కోరారు. అయితే రెండు రోజుల క్రితం బాబా ప్రభుత్వాన్ని ఎదుర్కొనడానికి స్థానిక దళాలను ఏర్పాటు చేస్తానని చెప్పిన నేపథ్యంలో అన్నా హజారే బాబాతో విభేదించినట్లుగా తెలుస్తోంది.

కాగా డెహ్రాడూన్ ప్రైవేటు హాస్పిటల్‌లో చికిత్స పొందుతున్న బాబా రామ్‌దేవ్‌ను ఆర్ట్ ఆఫ్ లివింగ్ రవిశంకర్ కలిశారు. ప్రభుత్వం బాబా దీక్ష విరమింప జేసేందుకు చర్యలు తీసుకోవాలని కోరారు. బాబా నిరాహారదీక్ష విరమించాలని ఆర్‌ఎస్‌ఎస్ అధిపతి మోహన్ భాగవత్ నాగపూర్‌లో విజ్ఞప్తి చేశారు. దేశానికి రామ్‌దేవ్ సేవలు ఎంతో అవసరమని, క్షీణిస్తున్న ఆరోగ్యాన్ని దృష్టిలో పెట్టుకుని దీక్ష మానుకోవాలని ఆయన కోరారు. అవినీతిపై రామ్‌దేవ్ చేస్తున్న పోరాటాన్ని యావత్ జాతి గుర్తించిందని శనివారం విడుదల చేసిన ప్రకటనలో పేర్కొన్నారు. దీక్ష విరమించి జాతిని జాగృతం చేసే ఉద్యమాన్ని చేపట్టాలని విజ్ఞప్తి చేశారు. రామ్‌దేవ్ అరెస్ట్, ఆస్పత్రి పాలవడం పట్ల ఆయన మద్దతుదారులు ఆందోళన చెందుతున్నారని భాగవత్ తెలిపారు.