నోకియా, ఆపిల్‌ భాయ్ భాయ్: పరిష్కారం కుదిరిన పేటెంట్‌ దావాలు

న్యూయార్క్‌: ఐఫోన్‌ తయారీ సంస్థ ఆపిల్‌తో అన్ని పేటెంట్‌ వ్యాజ్యాల పరిష్కారానికి అంగీకారం కుదిరిందని నోకియా కంపెనీ పేర్కొంది. ఈ చర్యతో రెండో త్రైమాసికంలో ఫిన్నిష్‌ కంపెనీకి లబ్ధి చేకూరగలదని భావిస్తున్నారు. ఆపిల్‌తో పేటెంట్‌ లైసెన్స్‌ ఒప్పదంపై సంతకం చేసినట్లు నోకియా ప్రకటించిందని ఫిన్నిష్‌ సెల్‌ఫోన్‌ తయారీ సంస్థ తెలిపింది. యుఎస్‌ అంతర్జాతీయ వాణిజ్య సంఘానికి నోకియా, ఆపిల్‌ ఇచ్చిన ఫిర్యాదులను ఉపసంహరించుకోవడంతో పాటు కంపెనీల మధ్య అన్ని పేటెంట్‌ వ్యాజ్యాలకు ఈ ఒప్పందం పరిష్కారాన్ని ఇవ్వనుంది.

నోకియా ప్రెసిడెంట్‌, సిఇఒ స్టీఫెన్‌ ఎలోప్‌ మాట్లాడుతూ, ఆపిల్‌ చేరికతో నోకియా లైసెన్సీల సంఖ్య వృద్ధి చెందినందుకు తాము చాలా ఆనందంగా ఉన్నామని అన్నారు. ఆర్థిక వివరాలను వెల్లడించలేదు. కానీ ఆపిల్‌ నోకియాకు ఒకసారి చెల్లింపు, అలాగే ఒప్పందం ప్రకారం రాయల్టి చెల్లిస్తుంది. ఈ ఒప్పందం నోకియా వచ్చే ఆర్థిక ఫలితాలపై సానుకూల ప్రభావం చూపనుందని భావిస్తున్నారు. 2009 అక్టోబర్‌ నుంచి రెండు మొబైల్‌ కంపెనీల మధ్య వ్యాజ్యాల వివాదం కొనసాగుతోంది.

10 పేటెంట్లకు సంబంధించి ఆపిల్‌ను విమర్శిస్తూ నోకియా దావా దాఖలు చేయగా, ఐఫోన్‌కు సంబంధించి 13 ఆపిల్‌ పేటెంట్లపై నోకియాపై ఆరోపణలు చేస్తూ 2009 డిసెంబర్‌లో ఆపిల్‌ ప్రతిగా దావాను దాఖలు చేసింది. 2011 మార్చిలో నోకియా ఆపిల్‌పై అమెరికా వాణిజ్య సంఘానికి ఫిర్యాదు చేసింది.

English summary

The iPhone maker Apple and the world's largest mobile phone manufacturer Nokia have agreed to settle a long-running patent dispute after the US-based Apple decided to offer an undisclosed one-off payment to Nokia.