రాజీనామాలకు యశ్వంత్ సిన్హా, శతృఘ్న సిన్హా రెడీ

By Pratap

Published: Wednesday, August 24, 2011, 16:42 [IST]

న్యూఢిల్లీ: అవినీతిని తమ పార్టీ తీవ్రంగా పరిగణించకపోవడాన్ని నిరసిస్తూ బిజెపి నేతలు యశ్వంత్ సిన్హా, శతృఘ్న సిన్హాలతో పాటు ముగ్గురు తమ పార్లమెంటు సభ్యత్వాలకు రాజీనామాలు చేయడానికి సిద్ధపడ్డారు. యశ్వంత్, శతృఘ్నలతో పాటు మరో పార్లమెంటు సభ్యుడు ఉదయ్ సింగ్ కూడా రాజీనామా చేయడానికి సిద్దపడ్డారు. ప్రస్తుత పార్లమెంటు సమావేశాలపై, ప్రభుత్వం తలపెట్టిన అఖిల పక్ష సమావేశంపై చర్చించడానికి ఏర్పాటైన పార్లమెంటరీ పార్టీ సమావేశంలో వారు తమ అభిప్రాయాలను వ్యక్తం చేశారు.

లోక్‌పాల్ అంశంపై బిజెపి బలమైన వైఖరిని తీసుకోవడం లేదని, అవినీతికి వ్యతిరేకంగా జరుగుతున్న పోరాటాన్ని ముందుకు తీసుకుని వెళ్లకపోవడాన్ని యశ్వంత్ సిన్హా తప్పు పట్టారు. ఎల్‌కె అద్వానీ అధ్యక్షతన జరిగిన సమావేశంలో అన్నా హజారే ఆరోగ్యంపై యశ్వంత్ సిన్హా ఆందోళన వ్యక్తం చేశారు. హజారే వ్యవహారంపై బిజెపి మాట వరుసకే మద్దతు ప్రకటిస్తోందని, స్పష్టమైన వైఖరి తీసుకోవడం లేదని యశ్వంత్ సిన్హా విమర్సించారు. వారిద్దరి మాటలకు పెద్దగా ప్రాధాన్యం ఇవ్వాల్సిన అవసరం లేదని, ఇటువంటి సమావేశాల్లో భిన్నమైన అభిప్రాయాలు వ్యక్తమవుతాయని బిజెపి సీనియర్ నాయకుడు ఆహ్లూవాలియా అన్నారు.

Published On August 24, 2011