సిబిఐ ఎదుట హాజరైన కోనేరు ప్రసాద్ తనయుడు

By Pratap

Published: Monday, November 7, 2011, 18:14 [IST]

హైదరాబాద్: ఎమ్మార్ ప్రాపర్టీస్ కేసులో అరెస్టయిన స్టైలిష్ హోమ్స్ మేనేజింగ్ డైరెక్టర్ కోనేరు ప్రసాద్ కుమారుడు కోనేరు ప్రదీప్ సోమవారం సిబిఐ అధికారుల ముందు హాజరయ్యారు. కోనేరు ప్రదీప్‌ను సిబిఐ అధికారులు ప్రశ్నించారు. కోనేరు ప్రదీప్ ఖాతాల్లో భారీ మొత్తంలో సొమ్ము ఉన్నట్లు సిబిఐ అధికారులు భావిస్తున్నారు. కోనేరు ప్రదీప్ ట్రైమెక్స్ శాండ్స్ సిఇవోగా వ్యవహరిస్తున్నారు. తమ కస్టడీలోకి తీసుకున్న కోనేరు ప్రసాద్‌ను సిబిఐ అధికారులు వరుసగా మూడో రోజు విచారిస్తున్నారు. ఆయన ఖాతాల్లో ఉన్న సొమ్ముపై కూడా ఆరా తీస్తున్నారు. ప్రదీప్ ఖాతాల్లోకి సొమ్ము ఎలా వచ్చి చేరిందనే విషయంపై కూడా సిబిఐ అధికారులు ఆరా తీస్తున్నారు.

కాగా, గాలి జనార్దన్ రెడ్డి గనుల అక్రమ తవ్వకం కేసులో కూడా సిబిఐ అధికారులు దర్యాప్తును ముమ్మరం చేశారు. గాలి జనార్దన్ రెడ్డి వ్యక్తిగత సహాయకుడు (పిఎ) అలీఖాన్ కోసం సిబిఐ అధికారులు అన్వేషణ ప్రారంభించారు. అతని కోసం లుక్ అవుట్ నోటీసులు జారీ చేసి అంతర్జాతీయ విమానాశ్రయాలను అప్రమత్తం చేశారు. గాలి జనార్దన్ రెడ్డికి చెందిన అస్తులు, సొమ్ము వివరాలు అలీఖాన్ వద్ద ఉన్నట్లు సిబిఐ అధికారులు అనుమానిస్తున్నారు. అలీఖాన్ ల్యాప్‌టాప్‌లో వివరాలన్నీ ఉంటాయని వారు భావిస్తున్నట్లు సమాచారం.

Published On November 7, 2011