కాంగ్రెస్ అభ్యర్థికి టిఆర్ఎస్ కెటిఆర్, హరీష్ ఆల్ ద బెస్ట్

By Srinivas

Published: Wednesday, February 22, 2012, 10:17 [IST]

హైదరాబాద్: త్వరలో జరగనున్న ఉప ఎన్నికల్లో పోటీ చేస్తున్న కాంగ్రెసు పార్టీ అభ్యర్థికి తెలంగాణ రాష్ట్ర సమితి శాసనసభా పక్ష నేత ఈటెల రాజేందర్, సిరిసిల్ల శాసనసభ్యుడు కల్వకుంట్ల తారక రామా రావు మంగళవారం ఆల్ ద బెస్ట్ చెప్పారు. మంగళవారం శాసనసభ ప్రాంగణంలో ఈ ఆసక్తికర సన్నివేశం చోటు చేసుకుంది. వరంగల్ జిల్లా స్టేషన్ ఘనపూర్ నుండి కాంగ్రెసు పార్టీ అభ్యర్థిగా రాజారపు ప్రతాప్‌ను అధిష్టానం నిర్ణయించింది. ఈ సందర్భంగా ప్రభుత్వ చీఫ్ విప్ గండ్ర వెంకట రమణా రెడ్డి అభ్యర్థి ప్రతాప్‌ను సిఎల్పీ కార్యాలయానికి తీసుకు వెళుతున్నారు.

వారు సిఎల్పీ కార్యాలయానికి వెళుతుండగా టిఆర్ఎస్ ఎమ్మెల్యేలు ఈటెల రాజేందర్, కెటి రామారావు, సిద్దిపేట శాసనసభ్యుడు హరీశ్ రావు, శాసనమండలి సభ్యుడు నారదాసు లక్ష్మణ రావు తదితరులు ఎదురుపడ్డారు. ఆ సమయంలో గండ్ర తనతో ఉన్న ప్రతాప్‌ను వారికి పరిచయం చేశారు. ఉప ఎన్నికల్లో ప్రతాప్‌కు టిక్కెట్ దక్కనుందని గండ్ర వారితో చెప్పారు. త్వరలో ఉప ఎన్నికలు జరగనున్నాయి కాబట్టి శత్రువు ఎవరో తెలిసి ఉండటం మంచిదని పరిచయం చేస్తున్నానని గండ్ర నవ్వుతూ చెప్పారు. అందుకు ఎమ్మెల్యేలు నవ్వుతూనే ప్రతాప్‌కు ఆల్ ద బెస్ట్ చెప్పారు.

Published On February 22, 2012