5 లక్షలకే సరికొత్త 3డీ ప్రింటెడ్ ఇల్లు! బుర్రిపాలెంలో భారీ శంకుస్థాపన

ఆంధ్రప్రదేశ్‌లోని పేదల సొంతింటి కల నెరవేర్చే దిశగా రాష్ట్ర ప్రభుత్వం మరో చారిత్రాత్మక అడుగు వేసింది. గుంటూరు జిల్లా తెనాలి నియోజకవర్గ పరిధిలోని బుర్రిపాలెం గ్రామంలో ప్రధానమంత్రి ఆవాస్‌ యోజన (గ్రామీణ్‌-2.0) పథకం కింద రూపుదిద్దుకోనున్న 3 లక్షల ఇళ్ల నిర్మాణ పనులకు ముఖ్యమంత్రి నారా చంద్రబాబు నాయుడు, కేంద్రమంత్రి శివరాజ్‌సింగ్ చౌహాన్, కేంద్ర సహాయ మంత్రి పెమ్మసాని చంద్రశేఖర్ సంయుక్తంగా భూమిపూజ చేశారు.

ఈ కార్యక్రమంలో భాగంగా ఓ లబ్ధిదారు నివాస స్థలంలో ఇద్దరూ స్వయంగా శంకుస్థాపన చేసి, ఆ కుటుంబ సభ్యులకు కొత్త బట్టలు బహూకరించి ఆప్యాయంగా పలకరించారు. తమ ఇంటి నిర్మాణాన్ని ప్రధాని ప్రతినిధులైన ముఖ్యమంత్రి, కేంద్రమంత్రి చేతుల మీదుగా ప్రారంభించడం పట్ల లబ్ధిదారులు ఎంతో సంతోషం వ్యక్తం చేశారు.

దేశంలోనే తొలిసారిగా ప్రభుత్వ ఆధ్వర్యంలో అత్యాధునిక '3డీ కాంక్రీట్ ప్రింటింగ్' సాంకేతికతతో ఇళ్లను నిర్మించే పైలట్ ప్రాజెక్ట్‌కు కూడా ఈ వేదికగానే శ్రీకారం చుట్టారు. బుర్రిపాలెం, ఓబులనాయుడుపాలెం గ్రామాలలో మొదటి విడతగా 177 మోడల్ ఇళ్లను ఈ నూతన పద్ధతిలో నిర్మించనున్నారు. ఈ సాంకేతిక సహకారం కోసం రూర్కీకి చెందిన ప్రముఖ పరిశోధనా సంస్థ 'సెంట్రల్ బిల్డింగ్ రీసెర్చ్ ఇన్‌స్టిట్యూట్' (సీబీఆర్‌ఐ) తో ఒప్పందం కుదుర్చుకున్నారు. ఈ ప్రాజెక్ట్ ద్వారా తక్కువ వ్యయంతో, తక్కువ సమయంలోనే ఎంతో పటిష్టమైన నిర్మాణాలు సాధ్యమవుతాయని కేంద్రమంత్రి తెలిపారు. ఇళ్లు ఎండ తీవ్రతను తట్టుకుని, లోపల తక్కువ ఉష్ణోగ్రత ఉండేలా ఈ కొత్త టెక్నాలజీతో డిజైన్ చేస్తున్నట్లు సీఎం చంద్రబాబు వివరించారు

ఈ సరికొత్త 3డీ ఇళ్ల నిర్మాణం కోసం ప్రతి ఇంటికి రూ.5.10 లక్షల వ్యయాన్ని ఖరారు చేశారు. సాధారణంగా పీఎంఏవై కింద కేంద్ర, రాష్ట్ర ప్రభుత్వాలు కలిసి ఇచ్చే రూ.2.39 లక్షల ఆర్థిక సాయానికి అదనంగా, నూతన సాంకేతికతను ప్రోత్సహించేందుకు ప్రభుత్వం మరిన్ని నిధులను సమకూరుస్తోంది. కేవలం గోడలు, స్లాబ్ వేయడమే కాకుండా.. స్థల అభివృద్ధి, మెట్లు, మరుగుదొడ్డి, ర్యాంప్, షెడ్ వంటి అన్ని రకాల మౌలిక వసతులను ఈ బడ్జెట్‌లోనే పూర్తి చేయనున్నారు. రాష్ట్రంలో కూటమి ప్రభుత్వం బాధ్యతలు చేపట్టిన తర్వాత పీఎంఏవై గ్రామీణ్‌-2.0 కింద మొత్తం 3 లక్షల ఇళ్లు మంజూరు కాగా, గతంలో ఇచ్చిన 75 వేల గృహాలకు తోడుగా తాజాగా మరో 2.25 లక్షల ఇళ్లకు కేంద్రం తుది అనుమతులు ఇచ్చింది.

2029 నాటికి ఇళ్లు లేని పేదే ఉండకూడదు: సీఎం చంద్రబాబు ఆశాభావం

ఆంధ్రప్రదేశ్‌లో నిరుపేదల సొంతింటి కలను నెరవేర్చడమే ధ్యేయంగా కూటమి ప్రభుత్వం నిరంతరం శ్రమిస్తోందని ముఖ్యమంత్రి నారా చంద్రబాబు నాయుడు స్పష్టం చేశారు. సాధారణంగా రాష్ట్రానికి 75 వేల ఇళ్లు మాత్రమే మంజూరైనప్పటికీ, ఏపీకి ఉన్న ప్రత్యేక అవసరాల దృష్ట్యా కేంద్రానికి చేసిన విజ్ఞప్తి మేరకు తొలి విడతగా ఏకంగా 3 లక్షల ఇళ్లను కేటాయించారని సీఎం వెల్లడించారు. ఈ ఇళ్ల నిర్మాణం పూర్తయిన వెంటనే మరో 3 లక్షలు, ఆపై వచ్చే ఏడాదితో కలిపి మొత్తం 9 లక్షల ఇళ్లను రాష్ట్రానికి మంజూరు చేసేందుకు కేంద్రమంత్రి హామీ ఇవ్వడం పట్ల ఆయన హర్షం వ్యక్తం చేశారు. 2029 నాటికి రాష్ట్రంలో వంద శాతం ఇళ్లు లేని పేదలకు పక్కా ఇళ్లు నిర్మించి ఇవ్వాలనే లక్ష్యంతో ప్రణాళికాబద్ధంగా పనిచేస్తున్నామని పేర్కొన్నారు.

సాంకేతిక విప్లవం: బుర్రిపాలెంలో '3డీ' కాంక్రీట్ ఇళ్లు

నటరత్నం, సూపర్‌స్టార్ కృష్ణ జన్మించిన పుణ్యభూమిగా చరిత్రకెక్కిన బుర్రిపాలెం గ్రామం నుంచి ఇప్పుడు పెమ్మసాని చంద్రశేఖర్ పొలిటికల్ హీరోగా ఎదిగారని సీఎం కొనియాడారు. వినూత్న సాంకేతికతకు నిలయంగా మారిన ఈ గ్రామంలోనే దేశంలోనే తొలిసారిగా 3డీ కాంక్రీట్ ప్రింటింగ్ టెక్నాలజీతో మోడల్ ఇళ్ల నిర్మాణాన్ని పైలట్ ప్రాజెక్ట్‌గా చేపడుతున్నామని సీఎం సభలో ప్రకటించారు. ఈ ఆధునిక విధానంలో నిర్మించే ఇళ్లలో బయటి వాతావరణం కంటే కనీసం 8 డిగ్రీల ఉష్ణోగ్రత తక్కువగా ఉండి, వేసవిలోనూ చల్లటి వాతావరణాన్ని అందిస్తాయని తెలిపారు.

గత ప్రభుత్వం నివాస యోగ్యం లేని చెరువుల్లో, కొండల్లో స్థలాలు ఇచ్చి పేదలను తీవ్రంగా మభ్యపెట్టిందని, అందువల్లే దాదాపు 4 లక్షల మంది ఆ స్థలాలను తిరస్కరించిన విషయాన్ని గుర్తుచేశారు. గడిచిన ఐదేళ్లలో 6 లక్షల ఇళ్లను రద్దు చేసి హౌసింగ్ రంగాన్ని తీవ్రంగా భ్రష్టు పట్టించారని, తమ ప్రభుత్వం అధికారంలోకి రాగానే భూ సమస్యలను పరిష్కరించి రూ.52 వేల కోట్ల విలువైన స్థలాలను పేదలకు పంపిణీ చేస్తూ ఆత్మగౌరవంతో కూడిన పట్టాభిషేకం చేసిందని గుర్తుచేశారు.

పల్లెల సమగ్ర వికాసం - రాయలసీమకు గ్లోబల్ హార్టీకల్చర్ హబ్

గ్రామీణ ప్రాంతాల జీవన ప్రమాణాలు పెంచి, మౌలిక వసతులు కల్పించడానికే తమ ప్రభుత్వం ప్రాధాన్యత ఇస్తోందని, 'పల్లె పండుగ' ద్వారా ఇప్పటికే రూ.11,500 కోట్లతో అభివృద్ధి పనులను పల్లెల్లో ప్రారంభించామని సీఎం తెలిపారు. రాబోయే ఐదేళ్ల కాలంలో పల్లెల అభివృద్ధి కోసం ఏకంగా రూ.1.30 లక్షల కోట్లు వెచ్చిస్తామని హామీ ఇచ్చారు. ఇదే సమయంలో రాయలసీమ ప్రాంతాన్ని కరవు రహితంగా మార్చేందుకు రూ.1 లక్ష కోట్లతో 'గ్లోబల్ హార్టీకల్చర్ హబ్' ఏర్పాటుకు అంకురార్పణ చేశామని వివరించారు. గతంలో తీవ్ర ప్రతికూల పరిస్థితుల్లోనూ పట్టిసీమ ప్రాజెక్టును పూర్తి చేసి, గోదావరి జలాలను కృష్ణా డెల్టాకు తరలించి ఎండిపోతున్న పంటలను కాపాడిన తీరును గుర్తుచేసుకుంటూ, పోలవరం ప్రాజెక్ట్‌ను కూడా త్వరితగతిన పూర్తి చేసి అన్ని ప్రాంతాల నీటి సమస్యకు శాశ్వత పరిష్కారం చూపుతామన్నారు.

స్వర్ణాంధ్ర దిశగా అడుగులు: క్వాంటం కంప్యూటింగ్ నుంచి ప్రకృతి సేద్యం వరకు

రాష్ట్రాన్ని అన్ని రంగాల్లో అగ్రపథంలో నిలిపేలా స్వర్ణాంధ్ర ప్రణాళిక అమలు చేస్తున్నామని, రాజధాని అమరావతి అభివృద్ధితో దాని సమీపంలోని తెనాలి వంటి ప్రాంతాలు పెద్ద ఎత్తున మెగాసిటీలుగా మారి రూపురేఖలు మార్చుకుంటాయని ముఖ్యమంత్రి ధీమా వ్యక్తం చేశారు. 2027 ఫిబ్రవరి నాటికి అమరావతి వేదికగా ప్రపంచంలోనే అత్యంత ఆధునికమైన క్వాంటం కంప్యూటర్ కార్యకలాపాలు ప్రారంభం కానున్నాయని వివరించారు. అలాగే సాంకేతికతతో పాటు వ్యవసాయంలో పర్యావరణ పరిరక్షణకు ప్రకృతి సేద్యమే భారత్‌కు శ్రీరామరక్ష అని పిలుపునిచ్చారు.

రాష్ట్రవ్యాప్తంగా భూవివాదాలు లేని ఏపీగా తీర్చిదిద్దుతూ రాజముద్రతో కూడిన పట్టాదారు పాస్ పుస్తకాలను రైతులకు అందిస్తున్నామని తెలిపారు. సూపర్‌ సిక్స్‌ హామీల అమలులో భాగంగా కేవలం సామాజిక పింఛన్ల రూపంలోనే రూ.76 వేల కోట్లు పేదల ఖాతాల్లో జమ చేశామని చెప్పారు. అనంతరం సభా వేదికపై లక్ష్మి అనే లబ్ధిదారురాలికి సీఎం చంద్రబాబు, కేంద్రమంత్రి శివరాజ్ సింగ్ చౌహాన్‌ల చేతుల మీదుగా నూతన ఇల్లు మరియు స్థలానికి సంబంధించిన పట్టాను అందజేశారు.

English summary

Andhra Pradesh CM Chandrababu Naidu and Union Minister Shivraj Singh Chouhan laid the foundation for 3D concrete printed houses in Burripalem, Guntur. Under the PMAY-Gramin 2.0 scheme, AP is introducing India's first government-led 3D printed affordable housing technology in collaboration with CBRI.