మంగళగిరి మండలం ఆత్మకూరులో ఆక్రమణల తొలగింపు..బాధితుల ఆందోళనతో ఉద్రిక్తత

గుంటూరు జిల్లా మంగళగిరి మండలం ఆత్మకూరులో ఆక్రమణల తొలగింపు ప్రక్రియ ఉద్రిక్తతలకు కారణమైంది . అక్రమ నిర్మాణాల పేరుతో కొన్ని నివాసాలను అధికార యంత్రాంగం ఈరోజు ఉదయం కూల్చి వేసింది. బాధితులు అడ్డుకుంటున్నా పోలీసుల సహాయంతో రంగంలోకి దిగిన అధికార యంత్రాంగం, పొక్లెయిన్ ల సహాయంతో కొన్ని నివాసాలను కూల్చివేశారు.

రెవెన్యూ అధికారులు, భారీ పోలీసు బలగాలతో బలవంతంగా ఇళ్ళు ఖాళీ చేయిస్తూ కూల్చివేతలకు దిగడంతో బాధితులు ఆందోళన వ్యక్తం చేస్తున్నారు. దీంతో అక్కడ ఉద్రిక్త పరిస్థితి నెలకొంది.

గత నలభై సంవత్సరాలుగా తాము అక్కడ నివాసం ఉంటున్నామని, నిర్మాణాలకు సంబంధించిన కేసు న్యాయస్థానంలో విచారణ లో ఉండగానే అధికారులు అక్రమ కూల్చివేతలకు దిగారని బాధితులు ఆరోపిస్తున్నారు. అసలు ఇళ్ళ స్థలాలను కేటాయించకుండా కట్టడాలను ఎలా కూల్చేస్తారు అంటూ కన్నీటి పర్యంతం అవుతున్నారు.

అధికారుల తీరుతో బాధితులు ఆందోళనకు దిగారు. బాధితులకు తెలుగుదేశం పార్టీ నాయకులు , వామపక్ష నేతలు మద్దతుగా నిలిచారు. బాధితులకు ప్రత్యామ్నాయ స్థలాలు చూపించిన తర్వాత వారితో ఇళ్లను ఖాళీ చేయించాలని డిమాండ్ చేస్తున్నారు. అంతేకాదు కోర్టులో కేసు విచారణలో ఉన్న సమయంలో అధికారులు ఈ విధంగా చేయడం సమంజసం కాదని అధికారుల తీరుపై తీవ్ర ఆగ్రహం వ్యక్తం చేస్తున్నారు.

English summary

houses removal in Atmakuru, Mangalagiri zone has caused tensions. Authorities demolished some residences in the name of illegal structures this morning. Authorities with full police force , forcibly removing the houses and the victims are doing protest .