Corporate Layoffs: కార్పొరేట్ కాస్ట్ కటింగ్‌లో నలిగిపోతున్న 40ల తరం

ఉదయం ఆఫీస్‌కి బయలుదేరే సమయంలో పిల్లల స్కూల్ బ్యాగ్ చూసి, బ్యాంక్ నుంచి వచ్చిన ఈఎంఐ మెసేజ్ చదివి, "ఇంకో పది పదిహేను ఏళ్లు కష్టపడితే చాలు" అనుకునే వయసు ఇది. అదే 40 ఏళ్లు. కానీ నేటి కార్పొరేట్ (Corporate) ప్రపంచంలో ఈ వయసు భరోసాకు కాదు... భయానికి సంకేతంగా మారుతోంది. ఒకప్పుడు కెరీర్‌లో పీక్ అనుకున్న దశ, ఇప్పుడు ఒక్క మెయిల్ లేదా చిన్న కాల్‌తో ఖాళీ చేతులతో ఇంటికి వెళ్లాల్సిన దశగా మారిపోతోంది.

టెక్‌, కార్పొరేట్ రంగాల్లో 'లేఆఫ్స్'(Layoffs) అనే పదం ఇప్పుడు సాధారణ మాట అయిపోయింది. కంపెనీలు దీనికి 'రోల్ రేషనలైజేషన్', 'రిస్ట్రక్చరింగ్' లాంటి పేర్లు పెట్టుకుంటున్నా, వాస్తవం మాత్రం వేరే. ఎక్కువ జీతం తీసుకునే అనుభవజ్ఞులైన ఉద్యోగులను తొలగించి, తక్కువ వేతనంతో పని చేసే యువతను తీసుకోవడమే అసలు లక్ష్యం. అనుభవం ఒకప్పుడు బలం అయితే, ఇప్పుడు అదే భారంగా మారుతోంది. 20 ఏళ్లుగా సంస్థను నిలబెట్టిన వ్యక్తి ఒక్కసారిగా "కాస్ట్"గా మారిపోవడం ఈ తరం ఉద్యోగుల దుస్థితి.

40 ఏళ్ల వయసులో Corporate Layoffs..

ఇది కేవలం ఉద్యోగం కోల్పోవడం మాత్రమే కాదు. 40 ఏళ్ల వయసులో ఉన్న వ్యక్తికి బాధ్యతలు కూడా అదే స్థాయిలో ఉంటాయి. ఇంటి లోన్, పిల్లల చదువు, తల్లిదండ్రుల ఆరోగ్యం.. అన్నీ ఒకేసారి ఎదురవుతాయి. ఇలాంటి సమయంలో ఆదాయం ఆగిపోతే, ఆ కుటుంబం మొత్తం ఊగిపోతుంది. మన దేశంలో నిరుద్యోగులకు మద్దతిచ్చే బలమైన వ్యవస్థలు లేకపోవడంతో, ఈ వయసులో ఉద్యోగం పోయిన వారు మళ్లీ కొత్తగా మొదలు పెట్టలేక, అలాగని ఆగిపోలేక మధ్యలోనే చిక్కుకుపోతున్నారు.

యూత్ కావాలి, తక్కువకే రావాలి..

అనుభవం ఉన్నా అవకాశాలు లేకపోవడం నేటి విరోధాభాసం. బ్యాంకింగ్, మార్కెటింగ్, ఐటీ వంటి రంగాల్లో సంవత్సరాల తరబడి పని చేసిన నిపుణులు కూడా ఇప్పుడు "యువత కావాలి, తక్కువ ఖర్చు కావాలి" అనే మార్కెట్ డిమాండ్ ముందు నిలబడలేకపోతున్నారు. దీని వల్ల నైపుణ్యం ఉన్నవారు పనిలేకుండా ఉండిపోతుండగా, మరోవైపు సంస్థలు దీర్ఘకాలిక దృష్టిని కోల్పోతున్నాయి. ఈ పరిస్థితి కేవలం ఆర్థికంగా మాత్రమే కాదు, మానసికంగా కూడా సమాజాన్ని దెబ్బతీస్తోంది.

ఈ సమస్యకు పరిష్కారం ఉద్యోగులు మాత్రమే అప్‌స్కిల్ అవ్వాలనడం కాదు. సంస్థలు అనుభవాన్ని విలువగా చూడాల్సిన అవసరం ఉంది. అలాగే మిడ్-కెరీర్ దశలో ఎదురయ్యే ఉద్యోగ విరామాలకు భద్రత కల్పించే విధానాలు ప్రభుత్వం తీసుకురావాలి. లేఆఫ్స్ తాత్కాలికంగా కంపెనీల ఖర్చులు తగ్గించవచ్చు. కానీ ఒక తరం ఉద్యోగుల విశ్వాసాన్ని, గౌరవాన్ని కోల్పోయే ప్రమాదం కూడా అదే స్థాయిలో ఉంది. పని జీవితానికి ఒక గౌరవప్రదమైన ముగింపు ఉండాలి. అది నిర్ణయంతో రావాలి తప్ప, బలవంతంతో కాదు.

English summary

Once seen as a career peak, the age of 40 is now becoming the most vulnerable phase for corporate employees as layoffs, cost-cutting strategies and role rationalisation push experienced professionals out of jobs