EPF: టేక్ హోమ్ శాలరీ మారనుందా? మీ పే-స్లిప్‌లో భారీ మార్పులు..

ఉద్యోగులకు సంబంధించిన ప్రావిడెంట్ ఫండ్ నిబంధనలలో కేంద్ర ప్రభుత్వం కీలక మార్పులు చేసిన విషయం మనందరికి తెలిసిందే. ఎంతో కాలంగా ఎదురుచూస్తున్న పీఎఫ్ వేతన పరిమితిని (Wage Ceiling) నెలకు రూ.15,000 నుంచి ఏకంగా రూ.25,000కు పెంచుతూ కేంద్ర కేబినెట్ ఆమోదం తెలిపింది. దాదాపు 12 ఏళ్ల తర్వాత ఈ పరిమితిని సవరించడం విశేషం. ఈ తాజా నిర్ణయం వల్ల దేశవ్యాప్తంగా మరో 51 లక్షల మందికి పైగా ఉద్యోగులకు తప్పనిసరి సామాజిక భద్రత లభించనుంది. దీర్ఘకాలంలో ఇది రిటైర్మెంట్ సేవింగ్స్‌కు ఎంతో మేలు చేసినప్పటికీ.. ప్రస్తుతానికి మాత్రం ఉద్యోగుల నెలవారీ టేక్-హోమ్ శాలరీపై ఇది తీవ్ర ప్రభావం చూపనుంది.

పీఎఫ్ పరిమితి పెంపు వెనుక అసలు లెక్క ఇదే..

భారతదేశంలో ఉద్యోగుల శాలరీ మోడల్స్(CTC) చాలా సంక్లిష్టంగా ఉంటుంది. కంపెనీ భరించే మొత్తం ఖర్చును సీటీసీ అంటారు. ఇందులో బేసిక్ శాలరీ, కరవు భత్యం (DA), ఇంటి అద్దె భత్యం (HRA) వంటి ప్రత్యక్ష వేతనాలతో పాటు.. పీఎఫ్ రూపంలో యజమాని చెల్లించే పరోక్ష ఖర్చులు కూడా కలిసి ఉంటాయి. ఇంతకుముందు పీఎఫ్ నిబంధనల ప్రకారం రూ.15,000 వేతన పరిమితిపై 12 శాతం చొప్పున ఉద్యోగి, యజమాని ఇద్దరూ నెలకు రూ.1,800 వంతున జమ చేసేవారు. ఇప్పుడు ఈ పరిమితిని రూ.25,000కు పెంచడంతో ఆ 12 శాతం లెక్కింపు కింద జమ అయ్యే మొత్తం నెలకు రూ.3,000కు పెరుగుతుంది.

జీతం అలాగే ఉన్నా.. చేతికి అందే డబ్బులు కట్!

కొత్త నిబంధనల ప్రకారం ఉద్యోగి తరఫున పీఎఫ్ ఖాతాలోకి వెళ్లే నెలవారీ మదింపు రూ.1,800 నుంచి రూ.3,000కు అంటే రూ.1,200 పెరుగుతుంది. అలాగే యజమాని వాటా కూడా రూ.1,200 అదనంగా పెరుగుతుంది. ఫిక్స్డ్ సీటీసీ (Fixed CTC) విధానం ఉన్న కంపెనీలలో ఈ భారాన్ని సర్దుబాటు చేయడం కోసం ఇతర అలవెన్సులను తగ్గించే అవకాశం ఉంది. దీనివల్ల ఉద్యోగికి ప్రతి నెలా చేతికి అందే టేక్-హోమ్ శాలరీలో రూ.2,400 వరకు కోత పడే అవకాశం ఉందని ఆర్థిక నిపుణులు అంచనా వేస్తున్నారు. అయితే ఈ అదనపు మొత్తం ఎక్కడికీపోదని, ఉద్యోగి పీఎఫ్ అకౌంట్లోనే భద్రంగా ఉండి చక్రవడ్డీతో పెరుగుతుందని గుర్తుంచుకోవాలి.

కంపెనీల ముందున్న సవాళ్లు.. ఉద్యోగులు ఏం చేయాలి?

పెరిగిన పీఎఫ్ భారాన్ని ఎలా భరించాలనే దానిపై వివిధ రంగాల కంపెనీలు ప్రస్తుతం మల్లగుల్లాలు పడుతున్నాయి. కొన్ని కంపెనీలు మొత్తం సీటీసీని పెంచేందుకు మొగ్గు చూపవచ్చుగాక, మరికొన్ని మాత్రం పాత ప్యాకేజీలోనే అలవెన్సులు మార్చుతూ సర్దుబాటు చేసే అవకాశం ఉంది. ఈ నేపథ్యంలో ఉద్యోగులు తమ రాబోయే పే-స్లిప్స్‌ను క్షుణ్ణంగా పరిశీలించుకోవాలి. ఈ మార్పుల వల్ల తమ నెలవారీ ఆదాయంపై ఎలాంటి ప్రభావం పడుతుందనే దానిపై క్లారిటీ కోసం హెచ్‌ఆర్ టీమ్ ను సంప్రదించడం మంచిదని నిపుణులు సూచిస్తున్నారు.

English summary

The Union Cabinet raises the EPF wage ceiling from Rs 15,000 to Rs 25,000. Learn how higher provident fund contributions may impact your take-home salary and monthly cash flow.