Rupee: 110 పైసల పతనం, జీవిత కాల కనిష్ఠానికి రూపాయి

భారత స్టాక్ మార్కెట్లకు ఈ వారం నిరాశే మిగిలింది. అమెరికా-యూరప్ మధ్య వాణిజ్య ఉద్రిక్తతలు కొంత తగ్గుముఖం పట్టినప్పటికీ, దేశీయంగా మాత్రం ప్రతికూల అంశాలు మార్కెట్లను గట్టిగా దెబ్బతీశాయి. వారాంతానికి బీఎస్‌ఈ సెన్సెక్స్ 769.67 పాయింట్లు లేదా 2.43 శాతం నష్టపోయి 81,537.70 వద్ద నిలవగా, నిఫ్టీ50 241.25 పాయింట్లు (2.51%) పడిపోయి 25,048.65 స్థాయికి చేరింది. ఫలితంగా రూపాయి విలువ జీవిత కాల కనిష్ఠానికి చేరింది.

విదేశీ పెట్టుబడిదారుల భారీ అమ్మకాలు, రూపాయి బలహీనత, భారత్-అమెరికా వాణిజ్య ఒప్పందంపై కొనసాగుతున్న అనిశ్చితి, క్యూ3లో కంపెనీల లాభాలు అంచనాలకు తగ్గకుండా ఉండటం వంటి అంశాలు మార్కెట్ సెంటిమెంట్‌ను బాగా బలహీనపరిచాయి. రంగాల పరంగా చూస్తే ఈ వారం దాదాపు అన్ని సూచీలూ నష్టాల బాట పట్టాయి. నిఫ్టీ రియల్టీ సూచీ 11 శాతం పైగా క్షీణించగా, కన్స్యూమర్ డ్యూరబుల్స్ 6.5 శాతం, మీడియా రంగం సుమారు 4 శాతం పడిపోయాయి. ఆయిల్ & గ్యాస్, ఎనర్జీ, ఇన్‌ఫ్రా, డిఫెన్స్, హెల్త్‌కేర్ విభాగాలు ఒక్కొక్కటి సుమారు 3 శాతం మేర నష్టపోయాయి.

నష్టాల పరంపర..

మార్కెట్ క్యాపిటలైజేషన్ పరంగా చూస్తే, ఈ వారం అత్యధిక నష్టం రిలయన్స్ ఇండస్ట్రీస్‌కి వచ్చింది. ఆ తర్వాత ఐసీఐసీఐ బ్యాంక్, ఎటర్నల్ ఉన్నాయి. మరోవైపు హిందుస్థాన్ యూనిలీవర్, కోటక్ మహీంద్రా బ్యాంక్, టెక్ మహీంద్రా వంటి సంస్థలు తమ మార్కెట్ విలువను కొంత మేర పెంచుకున్నాయి.

నిధుల ప్రవాహాల విషయానికి వస్తే, ఈ వారంలో విదేశీ సంస్థాగత పెట్టుబడిదారులు (FIIలు) మొత్తం రూ.14,651.99 కోట్ల విలువైన ఈక్విటీలను విక్రయించారు. దీనికి భిన్నంగా దేశీయ సంస్థాగత పెట్టుబడిదారులు (DIIలు) రూ.20,746 కోట్ల పెట్టుబడులు పెట్టి మార్కెట్‌కు కొంత మద్దతు ఇచ్చారు.

మరింత దిగజారిన రూపాయి(Rupee)..

అదే సమయంలో రూపాయి (Rupee) మరింత ఒత్తిడిని ఎదుర్కొంది. అమెరికన్ డాలర్‌తో పోలిస్తే రూపాయి శుక్రవారం ట్రేడింగ్‌లో 91.97 వద్ద సరికొత్త కనిష్టాన్ని తాకింది. జనవరి 23న రూపాయి 91.96 వద్ద ముగియగా, అంతకుముందు వారం 90.86తో పోలిస్తే దాదాపు 110 పైసల పతనం నమోదైంది. మొత్తం మీద, దేశీయ, అంతర్జాతీయ అనిశ్చితుల మధ్య భారత మార్కెట్లు ఈ వారం గట్టి ఒత్తిడిలోనే కొనసాగాయి.

English summary

Rupee slides to a record low against the US dollar, intensifying pressure on Indian stock markets. Sensex and Nifty fell over 2% this week as FII outflows, weak Q3 earnings, trade deal delays, and sector-wide selling hit investor sentiment.