సిల్లీ ట్రోల్స్: బిల్కిస్ బానో కేసులో మంత్రి కేటీఆర్ రిప్లై, హైదరాబాద్ రేప్ కేసుపైనా ట్వీట్

Updated: Friday, August 19, 2022, 17:12 [IST]

హైదరాబాద్: గుజరాత్ రాష్ట్రంలోని బిల్కిస్ బానో అత్యాచారం కేసులో నిందితులైన 11 మంది ఖైదీలను విడుదల చేయడాన్ని తెలంగాణ మంత్రి కేటీఆర్ విమర్శించిన విషయం తెలిసిందే. అయితే, ఆయన చేసిన విమర్శలు ట్రోల్ అవుతున్నాయి. హైదరాబాద్ నగరంలో మైనర్ బాలికపై జరిగిన సామూహిక అత్యాచారం ఘటనలోనూ నిందితులు ఇటీవల బెయిల్‌పై విడుదలైన విషయం తెలిసిందే.

సిల్లీ ట్రోల్స్ అంటూ మంత్రి కేటీఆర్

ఈ నేపథ్యంలోనే హైదరాబాద్ నగరంలో మైనర్ పై జరిగిన అత్యాచారం కేసులో నిందితులకు బెయిల్ లభించడంపై స్పందించని కేటీఆర్.. గుజరాత్ రాష్ట్రంలోని విషయంపై స్పందించడాన్ని నెటిజన్లు ప్రశ్నిస్తున్నారు. ముందు ఇక్కడి సమస్యలను పట్టించుకుని ఆ తర్వాత ఇతర రాష్ట్రాల సమస్యలను ప్రస్తావించాలని అంటున్నారు. ఈ క్రమంలో మంత్రి కేటీఆర్ కూడా మళ్లీ స్పందించారు. సిల్లీ ట్రోల్స్ అంటూ నెటిజన్లకు కేటీఆర్ కౌంటర్ ఇచ్చారు. హైదరాబాద్ కేసులో నిందితులను త్వరగా అరెస్ట్ చేసి జైలుకు పంపారు అని చెప్పారు. 45 రోజుల తర్వాత.. హైకోర్టు వారికి బెయిల్ మంజూరు చేసింది. జువైనల్ జస్టిస్ యాక్ట్ ఐపీసీ, సీఆర్పీసీలోని లొసుగుల కారణంగా జూబ్లీహిల్స్ కేసులో రేపిస్టులు బెయిల్ పై విడుదలయ్యారు అని కేటీఆర్ ట్విట్టర్ వేదికగా స్పందించారు.

రేపిస్టులు జీవితాంతం జైల్లోనే ఉండాలంటూ కేటీఆర్

'అందుకే ఈ చర్యలను సవరించాలని నేను డిమాండ్ చేస్తున్నాను కాబట్టి ఏ రేపిస్ట్ బెయిల్ పొందలేరు. దోషిగా తేలినప్పుడు, మరణించే వరకు జైలులోనే ఉంటారు' అని బిల్కిస్ బానో కేసులో తన వైఖరిని కేటీఆర్ స్పష్టం చేశారు.

రేపిస్టులకు సన్మానాలా? అంటూ కేటీఆర్ ఫైర్

అంతకుముందు, 2002 గుజరాత్ అల్లర్ల సమయంలో బానోపై సామూహిక అత్యాచారం చేయడంతోపాటు ఆమె కుటుంబ సభ్యులలో ఏడుగురిని హత్య చేసిన కేసులో జీవిత ఖైదు పడిన 11 మంది వ్యక్తులను విడుదల చేయడాన్ని కేటీఆర్ తప్పుపట్టారు.
ఖైదీలకు మిఠాయిలు, పూలదండలతో స్వాగతం పలకడంపై ప్రత్యేకంగా స్పందిస్తూ.. 'ఇది మన దేశ సామూహిక మనస్సాక్షికి మాయని మచ్చ' అని కేటీఆర్ ట్వీట్ చేశారు.
"ఈ రోజు బిల్కిస్ బానోకి జరిగినది రేపు మనలో ఎవరికైనా జరగవచ్చు" అని కేటీఆర్ పేర్కొన్నారు.

హైదరాబాద్ మైనర్ గ్యాంగ్‌రేప్ కేసులో నిందితులకు బెయిల్

కాగా, 2008లో శిక్ష పడినప్పటి నుంచి జైలులో ఉన్న దోషులు - వారిలో ఒకరి అభ్యర్ధనపై నిర్ణయం తీసుకోవాలని సుప్రీం కోర్టు రాష్ట్రాన్ని కోరిన తర్వాత మాత్రమే ఉపశమన విధానం ప్రకారం విడుదల చేసినట్లు గుజరాత్ ప్రభుత్వం స్పష్టం చేసింది.

దాదాపు రెండు నెలల క్రితం హైదరాబాద్‌లోని జూబ్లీహిల్స్‌లో 17 ఏళ్ల యువతిపై అత్యాచారం చేసిన కేసు విషయానికొస్తే.. ఆరుగురిలో ఐదుగురు నిందితులు 18 సంవత్సరాల కంటే తక్కువ వయస్సు ఉన్నవారు, అంటే వారికి తక్కువ కఠినమైన చట్టాలు వర్తిస్తాయి. గత నెలలో వీరికి బెయిల్ వచ్చింది.
మైనర్ కాని సాదుద్దీన్ మాలిక్ 61 రోజుల జైలు శిక్ష తర్వాత ఆగస్టు ప్రారంభంలో బెయిల్ పొందాడు. పోలీసు విచారణ ముగిసి, ఛార్జిషీట్ కూడా దాఖలు చేసినందున మాలిక్ బెయిల్ పొందేందుకు అర్హుడని అతని తరపు న్యాయవాది వాదించారు.