సీఈసీ ఎఫెక్ట్..! ప్రతిపక్షాలకు అభిజీత్ దిప్కే కీలక పిలుపు-ఇకపై ఎన్నికల్లో..!

కేంద్ర ఎన్నికల సంఘంలో చోటు చేసుకుంటున్న విభేదాలు, వాటిపై విపక్షాలు స్పందిస్తున్న తీరుపై కాక్రోచ్ జనతా పార్టీ జాతీయ కన్వీనర్ అభిజీత్ దిప్కే (Abhijeet Dipke) సంచలన వ్యాఖ్యలు చేశారు. ముఖ్యంగా ఎన్నికల కమిషన్ ఎన్నికల్ని రిగ్గింగ్ చేస్తోందని ఆరోపిస్తూనే, అవే ఎన్నికల్లో తిరిగి పాల్గొంటూ విపక్షాలు ఓటర్లు, ప్రజలకు తప్పుడు సంకేతాలు ఇస్తున్నారని దిప్కే మండిపడ్డారు. దీనికి పరిష్కారంగా ఎన్నికల్ని బహిష్కరించాలంటూ అన్ని విపక్షాలకు కాక్రోచ్ బాస్ సూచించారు.

సీఈసీ వ్యవహారంలో గగ్గోలు పెడుతున్న ప్రతిపక్షాలను ఉద్దేశించి ఇవాళ అభిజీత్ దిప్కే ఓ ట్వీట్ చేశారు. అవును, ఎన్నికలలో రిగ్గింగ్ జరుగుతోంది, కానీ మీరు రిగ్గింగ్ జరిగిన ఎన్నికలలో పాల్గొనడం కొనసాగించినప్పుడు, మీరు ఈ ఎన్నికలకు చట్టబద్ధత కల్పించి, అవి స్వేచ్ఛగా, నిష్పక్షపాతంగా జరుగుతున్నాయనే భ్రమను కొనసాగించడంలో సహాయపడతారని చురకలు అంటించారు. బహుశా మీరు పోటీ చేయకపోతే మీ ఉనికికే ముప్పు వాటిల్లుతుందనే భయంతో పోటీ చేస్తూనే ఉండవచ్చన్నారు.

కానీ ఓట్లు దొంగిలించబడుతున్నప్పుడు, మీ ఎమ్మెల్యేలు, ఎంపీలను ప్రలోభపెడుతున్నప్పుడు, మీ పార్టీలు చీలిపోతున్నప్పుడు మీరు ఎలాంటి ఉనికిని కాపాడుకోవడానికి ప్రయత్నిస్తున్నారని విపక్షాలను దిప్కే సూటిగా ప్రశ్నించారు. ఇది రాజకీయ మనుగడ కాదని, మీకు కావలసినప్పుడు మిమ్మల్ని బలహీనపరచగల, మీ పార్టీని చీల్చగల లేదా మీ ఎన్నికైన ప్రతినిధులను తీసివేయగల వ్యవస్థలో మీరు కేవలం బ్రతికి ఉండటానికి ప్రయత్నిస్తున్నారని గుర్తుచేశారు. ఇలా మీరు ఎంతకాలం మనుగడ సాగించగలరని ప్రశ్నించారు.

మీకు ముఖ్యమైన రాష్ట్రాలలో ఎన్నికల రిగ్గింగ్ జరిగినప్పుడు మాత్రమే దాని గురించి మాట్లాడి, ఇతర చోట్ల జరిగినప్పుడు మౌనంగా ఉండలేరని విపక్షానికి తెలిపారు. ఎన్నికలలో రిగ్గింగ్ జరుగుతుంటే, అది ఏ రాష్ట్రంలో లేదా ఏ పార్టీ ప్రభావితమైందనే దానితో సంబంధం లేకుండా ముఖ్యమైన విషయం కావాలన్నారు. ఆట ఆడుతూనే, అది రిగ్గింగ్ జరిగిందని మీరు చెప్పలేరన్నారు. ఈ రిగ్గింగ్ ఎన్నికలకు చట్టబద్ధతను ఇచ్చే ఏకైక విషయం మీ భాగస్వామ్యమే అని తేల్చేశారు. మీ సొంత రాజకీయ మనుగడ గురించి ఆలోచించే ముందు, దేశం గురించి, దాని ప్రజాస్వామ్యం గురించి ఆలోచించాలన్నారు. ఒక దృఢమైన వైఖరిని తీసుకోవాలని, మోసపూరిత ఎన్నికలలో పాల్గొనడం మానుకోవాలని దిప్కే పిలుపునిచ్చారు.