ఢిల్లీలో దారుణంగా గాలి కాలుష్యం-నిర్మాణాలు, డీజిల్ బస్సుల నిషేధం..

ఢిల్లీలో గాలి కాలుష్యం అంతకంతకూ తీవ్రంగా మారుతున్న పరిస్ధితుల్లో ప్రభుత్వం ఇవాళ కఠిన చర్యలకు దిగింది. గాలి నాణ్యత అధ్వాన్నంగా ఉన్న నేపథ్యంలో, హర్యానా నుండి డీజిల్ బస్సుల ప్రవేశంపై నిషేధం, సిఎన్‌జి బస్సుల పెంపుతో సహా కొన్ని చర్యలను ఢిల్లీ ప్రభుత్వం స్పష్టంగా అమలు చేస్తున్నట్లు ఢిల్లీ పర్యావరణ మంత్రి గోపాల్ రాయ్ చెప్పారు. ఉష్ణోగ్రతలు తగ్గుదల కారణంగా వచ్చే పక్షం రోజులు ఢిల్లీకి కీలకమని అన్నారు.

ఢిల్లీ వాయు నాణ్యత సూచిక గత కొన్ని రోజులుగా 350 వద్ద కొనసాగుతోంది. దీనికి వాతావరణ శాస్త్రవేత్తలు నిరంతర వాతావరణ పరిస్థితుల్ని కారణంగా చెబుతున్నారు. ఈ పరిస్థితులు రాబోయే కొద్ది రోజులు కొనసాగుతాయని, రాబోయే పక్షం రోజులు ఢిల్లీకి కీలకమన్నారు. వాస్తవానికి జాతీయ రాజధానిలో గాలి నాణ్యత ఐదు రోజుల పాటు చాలా పేలవంగా ఉంటోంది. ఇవాళ ఉదయం 10 గంటలకు ఎయిర్ క్వాలిటీ ఇండెక్స్ (AQI) 372గా ఉంది. ఇది ఈ సీజన్‌లో ఇప్పటివరకు కనిష్ట ఉష్ణోగ్రత ఉన్నప్పటికీ అత్యధికంగా నమోదైంది.

రాబోయే ఐదు రోజుల పాటు AQI 400 మార్కు కంటే ఎక్కువ నమోదయ్యే ప్రాంతాల్లో నిర్మాణ పనులను ప్రభుత్వం నిషేధిస్తుందని మంత్రి గోపాల్ రాయ్ చెప్పారు. కేంద్ర ప్రభుత్వ వాయు కాలుష్య నియంత్రణ పథకంలోని రెండో దశ కింద నివారణ చర్యలను అమలు చేస్తున్నప్పటికీ, కాలుష్య స్థాయిలు పెరుగుతూనే ఉన్నాయి. అందువల్ల, ఏక్యూఐ 400 మార్క్‌ను దాటిన కిలోమీటర్ వ్యాసార్థంలో నిర్మాణ పనులు వరుసగా ఐదు రోజుల పాటు నిలిపివేస్తామన్నారు.

అటువంటి ప్రాంతాల్లో వాయు కాలుష్య నియంత్రణ చర్యలను పటిష్టంగా అమలు చేయాలని నోడల్ అధికారులను ఆదేశించినట్లు మంత్రి గోపాల్ రాయ్ తెలిపారు. బయోమాస్ బర్నింగ్‌ను నివారించడానికి సెక్యూరిటీ గార్డులకు హీటర్లను పంపిణీ చేయాలని ఢిల్లీ ప్రభుత్వం అన్ని విభాగాలు, నివాస సంక్షేమ సంఘాలకు ఆదేశాలు జారీ చేసింది. ప్రజా రవాణాను బలోపేతం చేయడానికి, వాహన కాలుష్యాన్ని తగ్గించడానికి కనీసం 1,000 ప్రైవేట్ సిఎన్‌జి బస్సులను కాంట్రాక్ట్ కిందకు తెస్తున్నారు.

English summary

delhi government has announced some key measures today to control air pollution in the city in wake of poor air quality.