M.K.Stalin: తమిళనాడు ఉపఎన్నికల్లో పోటీపై స్టాలిన్ కీలక నిర్ణయం..!
తమిళనాడురాజకీయాల్లో ఇప్పుడు అంతా ఉప ఎన్నికల వ్యూహాల చుట్టూనే చర్చ నడుస్తోంది. గత అసెంబ్లీ ఎన్నికల్లో డీఎంకే ఘోర పరాజయాన్ని మూటగట్టుకుంది. స్వయంగా ఆ పార్టీ అధినేత, మాజీ ముఖ్యమంత్రి ఎం.కే. స్టాలిన్ (M.K.Stalin)కొలత్తూరు నియోజకవర్గం నుంచి ఓడిపోవడం తమిళ రాజకీయాల్లో పెద్ద సంచలనమైంది. అప్పటి నుంచి ఆయనను ఎలాగైనా మళ్లీ శాసనసభకు పంపాలని పార్టీ శ్రేణులు బలంగా కోరుకుంటున్నాయి. రాబోయే ఉప ఎన్నికల్లో స్టాలిన్ను పోటీ చేయించాలని కే.ఎన్. నెహ్రూ వంటి సీనియర్ డీఎంకే నేతలు బహిరంగంగానే ప్రతిపాదిస్తున్నారు. అయితే, ఈ ప్రతిపాదనపై స్టాలిన్ పెద్దగా ఆసక్తి చూపడం లేదని విశ్లేషకులు చెబుతున్నారు.
ఉప ఎన్నికల్లో పోటీకి స్టాలిన్ దూరం (M.K.Stalin)
ఉప ఎన్నికల బరిలో నిలవడం స్టాలిన్ రాజకీయ భవిష్యత్తుకు పెద్ద రిస్క్గా మారే అవకాశం ఉందని రాజకీయ విశ్లేషకులు భావిస్తున్నారు. సాధారణంగా ఉప ఎన్నికల్లో ప్రభుత్వ యంత్రాంగం సహకారం వల్ల అధికారంలో ఉన్న పార్టీకే గెలుపు అవకాశాలు మెండుగా ఉంటాయి. ప్రస్తుతం రాష్ట్రంలో విజయ్ నేతృత్వంలోని తమిళగ వెట్రి కజగం (టీవీకే) అధికారంలో ఉంది. ఇలాంటి క్లిష్ట పరిస్థితుల్లో డీఎంకే అధినేత మళ్లీ బరిలోకి దిగి ఒకవేళ ఓటమి పాలైతే, అది ఆయన రాజకీయ ప్రతిష్టకు కోలుకోలేని పెద్ద దెబ్బ అవుతుంది. గెలిస్తే వచ్చే సాధారణ ఎమ్మెల్యే పదవి కంటే, ఓడిపోతే వచ్చే అవమానమే ఎక్కువ కాబట్టి దీనికి దూరంగా ఉండటమే శ్రేయస్కరమని డీఎంకే భావిస్తోంది.
ఉదయనిధి నాయకత్వంపై ప్రభావం పడకూడదనేనా?
ప్రస్తుతం అసెంబ్లీలో ఉదయనిధి స్టాలిన్ ప్రతిపక్ష నేతగా వ్యవహరిస్తున్నారు. సభలో సీఎం విజయ్ను ఆయనే దీటుగా ఎదుర్కొంటూ డీఎంకే గళాన్ని బలంగా వినిపిస్తున్నారు. ప్రస్తుతం తమిళనాడులో విజయ్ వర్సెస్ ఉదయనిధి స్టాలిన్ అన్నట్లుగా రాజకీయ ప్రచారం సాగుతోంది. ఇలాంటి కీలక తరుణంలో ఎం.కే. స్టాలిన్ మళ్లీ అసెంబ్లీలోకి అడుగుపెడితే పార్టీలో ద్వంద్వ నాయకత్వ సమస్య తలెత్తే ప్రమాదం ఉంది. ఇది భవిష్యత్తు నాయకుడిగా దూసుకుపోతున్న ఉదయనిధి ప్రాధాన్యతను తగ్గించవచ్చు. అందుకే పార్టీ పగ్గాలను ఉదయనిధి చేతుల్లోనే ఉంచి, తానే స్వయంగా బయట ఉండి వ్యూహాలు రచించడమే సురక్షితమని స్టాలిన్ భావిస్తున్నట్లు తెలుస్తోంది.
ప్రత్యక్ష ఎన్నికలకు దూరం
ఇటీవల అసెంబ్లీలో ముఖ్యమంత్రి విజయ్ "మీ నాన్న ఎక్కడ?" అంటూ వేసిన వ్యంగ్యాస్త్రాలకు కూడా స్టాలిన్ విభిన్న రీతిలో స్పందించారు. తాను శాసనసభలో లేకపోయినా ప్రజల గుండెల్లో, వారు అందుకుంటున్న మహిళా ద్రవ్య సహాయం వంటి సంక్షేమ పథకాల్లో తాను ఎల్లవేళలా ఉంటానని స్పష్టం చేశారు. ఈ వ్యాఖ్యలను బట్టి చూస్తే, ఆయనకు ప్రస్తుతానికి ఎన్నికల్లో పోటీ చేసే ఉద్దేశం లేదని అర్థమవుతోంది. భవిష్యత్తులో కూడా ప్రత్యక్ష ఎన్నికలకు దూరంగా ఉంటూ, పార్టీని నడిపించేందుకే ఆయన ప్రాధాన్యం ఇవ్వనున్నారు.
Click it and Unblock the Notifications
Sign in with Google