దళపతితో చేతులు కలిపిన దీదీ, ఇండియా కూటమిలో ప్రకంపనలు
తమిళనాడు అసెంబ్లీ ఎన్నికల సమరం ముంచుకొస్తున్న వేళ పొలిటికల్ స్క్రీన్ పై బిగ్ ట్విస్ట్ చోటుచేసుకుంది. అటు కోల్కతాలో మమతా బెనర్జీ, ఇటు చెన్నైలో ఎంకె. స్టాలిన్ జాతీయ స్థాయిలో ఒకే కూటమిలో ఉన్నప్పటికీ.. తమిళనాడు క్షేత్రస్థాయి రాజకీయాల్లో మాత్రం టీఎంసీ తన దారి మార్చుకుంది. నటుడు విజయ్ స్థాపించిన టీవీకే పార్టీకి తమ సంపూర్ణ మద్దతు ఉంటుందని టీఎంసీ ప్రకటించడం ఇప్పుడు దేశవ్యాప్తంగా చర్చనీయాంశమైంది.
తమిళనాడు, కేరళ, పుదుచ్చేరి రాష్ట్రాలకు టీఎంసీ కోఆర్డినేటర్గా వ్యవహరిస్తున్న జే. జార్జ్ ఈ కీలక నిర్ణయాన్ని వెల్లడించారు. పార్టీ అంతర్గత సమావేశాల్లో సుదీర్ఘ చర్చలు జరిపిన తర్వాతే విజయ్ పార్టీకి మద్దతు ఇవ్వాలని నిర్ణయించినట్లు ఆయన స్పష్టం చేశారు. టీఎంసీ కార్యకర్తలందరూ టీవీకే అభ్యర్థుల గెలుపు కోసం క్షేత్రస్థాయిలో పని చేయాలని ఆదేశాలు జారీ అయ్యాయి. ఈ విషయాన్ని కోల్కతాలోని పార్టీ ప్రధాన కార్యాలయానికి కూడా సమాచారం అందించినట్లు జార్జ్ వివరించారు.
డీఎంకేపై ఎందుకు ఇంత ఆగ్రహం?
గతంలో అన్నాడీఎంకే, డీఎంకేలకు అండగా నిలిచిన తృణమూల్.. ఈసారి ఎందుకు విజయ్ను ఎంచుకుంది అనే ప్రశ్నకు జార్జ్ ఘాటుగానే సమాధానమిచ్చారు.
- ప్రభుత్వ వ్యతిరేకత: ప్రస్తుత డీఎంకే పాలనపై ప్రజల్లో తీవ్ర అసంతృప్తి ఉందని ఆయన మండిపడ్డారు.
- ఆర్థిక భారం: నిత్యావసరాల ధరలు, విద్యుత్ సుంకాలు, ఆస్తి పన్నుల పెంపుతో సామాన్యుడు విసిగిపోయాడని ఆరోపించారు.
- అప్పుల కుప్ప: సంక్షేమ పథకాల పేరుతో రాష్ట్ర అప్పులు విపరీతంగా పెంచేశారని విమర్శించారు.
- వ్యక్తిగత విమర్శలు: రాజకీయాల్లోకి వచ్చిన విజయ్ వ్యక్తిగత జీవితంపై డీఎంకే నాయకులు చేస్తున్న విమర్శలను ఆయన తీవ్రంగా ఖండించారు.
విజయ్ చరిత్ర సృష్టిస్తారు!
"అవకాశవాద రాజకీయాల కాలం చెల్లింది.. విజయ్ తమిళనాడు రాజకీయాల్లో సరికొత్త చరిత్ర సృష్టిస్తారు" అని జార్జ్ ధీమా వ్యక్తం చేశారు. విజయ్కు ఉన్న ప్రజాదరణ, క్లీన్ ఇమేజ్ తమిళనాడులో మార్పుకు నాంది పలుకుతాయని టీఎంసీ స్థానిక విభాగం బలంగా నమ్ముతోంది.
అధిష్టానం మౌనం.. వ్యూహాత్మకమేనా?
అయితే, ఈ మద్దతు ప్రకటనపై టీఎంసీ సుప్రీమో మమతా బెనర్జీ లేదా కోల్కతా అధిష్టానం ఇప్పటివరకు నేరుగా స్పందించలేదు. ఇది కేవలం రాష్ట్ర స్థాయి కోఆర్డినేటర్ తీసుకున్న నిర్ణయమా లేక మమతా బెనర్జీ డైరెక్షన్ లోనే జరిగిందా? అనే విషయంలో స్పష్టత రావాల్సి ఉంది. ఒకవేళ ఇది పార్టీ అధికారిక నిర్ణయమే అయితే, జాతీయ స్థాయిలో 'ఇండియా' కూటమి ఐక్యతపై కూడా దీని ప్రభావం ఉండే అవకాశం ఉంది.
ఏప్రిల్ 23న జరగనున్న ఎన్నికల పోరులో టీఎంసీ మద్దతు విజయ్ పార్టీకి ఎంతవరకు ప్లస్ అవుతుందో చూడాలి. మొత్తానికి టీఎంసీ వేసిన ఈ అడుగు స్టాలిన్ నేతృత్వంలోని డీఎంకే శిబిరంలో మాత్రం టెన్షన్ పుట్టిస్తోంది.
Click it and Unblock the Notifications
Sign in with Google