"తగ్గేదేలేదు": విజయ్ సంచలన వ్యాఖ్యలు

తమిళ స్టార్ హీరో, టీవీకే పార్టీ అధ్యక్షుడు విజయ్ కీలక వ్యాఖ్యలు చేశారు. ఒత్తిళ్లకు తలొగ్గేది లేదని.. ఎవరికీ తలవంచేది లేదని తేల్చి చెప్పారు. ఇటీవల సీబీఐ అధికారులు విజయ్ ను విచారణ చేయడం, అలాగే విజయ్ చివరి సినిమా జన నాయగన్ రిలీజ్ వాయిదా పడడం తదితర పరిణామాల నేపథ్యంలో విజయ్ ఈ వ్యాఖ్యలు చేయడం ప్రాధాన్యం సంతరించుకుంది. విజయ్ టీవీకే పార్టీకి ఇటీవల ఎన్నికల కమిషన్ విజిల్ గుర్తును కేటాయించిన విషయం తెలిసిందే. ఈ క్రమంలో తాజాగా తమిళనాడులోని మహాబలిపురంలో నిర్వహించిన ఎన్నికల ర్యాలీలో విజయ్ పాల్గొన్నారు. కీలక వ్యాఖ్యలు చేశారు.

" ఇది కేవలం ఎలక్షన్ మాత్రమే కాదు.. ప్రజాస్వామ్య యుద్ధం. మీరు(కార్యకర్తలు) నా కమాండోలు. యుద్ధంలో పాల్గొనే వీరులు మీరే. ఎన్ని ఒత్తిళ్లు పెట్టినా ఎవరికీ తలవంచం. ఒత్తిళ్లకు తలొగ్గేది లేదు" అని విజయ్ కీలక వ్యాఖ్యలు చేశారు. అలాగే అధికార డీఎంకే, ప్రతిపక్ష ఏఐఏడీఎంకే పార్టీలను ఉద్దేశిస్తూ.. ప్రస్తుతం ఎవరైతే రాజకీయాల్లో ఉన్నారో.. వాళ్లు అన్న ను మర్చిపోయారంటూ ఎద్దేవా చేశారు. అన్న అంటే తమిళనాడు మాజీ సీఎం సీఎన్ అన్నాదురై అని అర్థం.

ఇక ఇటీవల విజయ్ టీవీకే పార్టీకి ఎలక్షన్ కమిషన్ విజిల్ గుర్తును కేటాయించిన సంగతి తెలిసిందే. ఈ పరిణామాల తర్వాత నిర్వహించిన తొలి సభలో విజయ్ కీలక వ్యాఖ్యలు చేయడం ప్రాధాన్యం సంతరించుకుంది. డీఎంకే, అన్నాడీఎంకే పార్టీలు బీజేపీకు సరెండర్ అయ్యాయని విజయ్ ఆరోపించారు. తమ పార్టీపై ప్రజలు పూర్తి విశ్వాసంతో ఉన్నారని తెలిపారు. తమిళనాడులో అవినీతిని అంతం చేసేందుకు సమయం వచ్చిందని విజయ్ స్పష్టం చేశారు.

ఇక మహాబలిపురంలో నిర్వహించిన సభకు పార్టీ కార్యకర్తలు, జిల్లాల అధ్యక్షులు, కో- ఆర్డినేటర్లు, ముఖ్య నేతలు, అభిమానులు తరలివచ్చారు. దీంతో సభ మొత్తం విజిల్ సౌండ్స్, కేరింతలు, చప్పట్లతో మారుమోగింది. ఈ ఏడాదిలోనే తమిళనాడులో అసెంబ్లీ ఎన్నికలు జరగనున్నాయి. ఈ క్రమంలో ఇప్పటినుంచే ప్రధాన పార్టీలన్నీ నువ్వా నేనా అన్నట్లుగా ఢీ కొంటున్నాయి. తమిళనాడు అసెంబ్లీ ఎన్నికల్లో తొలిసారి పోటీ చేస్తున్న విజయ్ కు పలు అడ్డంకులు ఎదురవుతున్నాయి.

గతేడాది కరూర్ ర్యాలీలో తొక్కిసలాట జరిగి 41 మంది ప్రాణాలు కోల్పోవడం, ఈ కేసు విచారణలో భాగంగా సీబీఐ అధికారుల ముందు విజయ్ పలుమార్లు హాజరు కావడం, అలాగే విజయ్ చివరి సినిమా జన నాయగన్ విడుదలను కోర్టు నిలిపివేయడం ఇలా వరుస అడ్డంకుల మధ్య విజయ్ ఎన్నికల శంఖారావం పూరించారు. మరి ఈ ఏడాది ఎన్నికల్లో విజయ్ పార్టీ బోణీ కొడుతుందా లేదా చూడాలి.