బాంబు పేల్చిన డొనాల్డ్ ట్రంప్

Donald Trump vs Harvard University: అమెరికా అధ్యక్షుడు డొనాల్డ్ ట్రంప్ తీసుకుంటోన్న నిర్ణయాలు, జారీ చేస్తోన్న ఎగ్జిక్యూటివ్ ఆర్డర్లపై తీవ్ర వ్యతిరేకత ఎదురవుతోంది. అమెరికా మేక్ గ్రేట్ అగైన్ కాన్సెప్ట్ కింద ప్రపంచ దేశాలపై ఇష్టానుసారంగా విధిస్తోన్న టారిఫ్ వ్యవహారం.. అక్కడి వాళ్లకే రుచించట్లేదు. దీన్ని నిరసిస్తూ ఇప్పటికే రోడ్డెక్కారు అమెరికన్లు.

అదే సమయంలో- మరో వివాదం తెర మీదికి వచ్చింది. ప్రఖ్యాత హార్వర్డ్ యూనివర్శిటీకి 100 మిలియన్ డాలర్ల కాంట్రాక్టులను రద్దు చేయాలని నిర్ణయించింది. దీనికి సంబంధించిన సర్కులర్ ను త్వరలోనే ఫెడరల్ ఏజెన్సీలన్నింటికీ జారీ చేయనున్నట్లు వైట్ హౌస్ వెల్లడించింది.

హార్వర్డ్ యూనివర్శిటీతో ఏఏ రంగానికి సంబంధించిన కాంట్రాక్ట్ ఒప్పందాలను కుదుర్చుకున్నామనే వివరాలను సేకరిస్తోన్నామని పేర్కొంది. వివిధ రంగాలు, విభాగాలకు సంబంధించి 100 మిలియన్ డాలర్ల విలువ చేసే కాంట్రాక్టులు దాదాపుగా 30 వరకు హార్వర్డ్ యూనివర్శిటీతో కుదుర్చుకుని ఉండొచ్చని అంచనావేసింది వైట్ హౌస్.

వాటన్నింటినీ కూడా పునఃసమీక్షించాలని డొనాల్డ్ ట్రంప్ ఆదేశించినట్లు వివరించింది. గతంలో హార్వర్డ్ యూనివర్శిటీకి 2.3 బిలియన్లకు పైగా మంజూరు చేయాల్సిన గ్రాంట్లను నిలిపివేస్తూ ఉత్తర్వులు సైతం జారీ చేశారు ట్రంప్. ఇప్పుడు తాజాగా 100 మిలియన్ డాలర్ల కాంట్రాక్టుల రద్దు చేయాలని నిర్ణయించడం ప్రాధాన్యతను సంతరించుకుంది.

ఇదివరకే హర్వర్డ్ యూనివర్శిటీకి షాక్ ఇచ్చింది ట్రంప్ అడ్మినిస్ట్రేషన్. విదేశీ విద్యార్థుల అడ్మిషన్లను నిలిపివేసింది. స్టూడెంట్ అండ్ ఎక్స్ఛేంజ్ విజిటర్ ప్రోగ్రామ్ సర్టిఫికేషన్‌ను రద్దు చేసింది. కొత్తగా అంతర్జాతీయ విద్యార్థులను చేర్చుకోవడాన్ని అవకాశం లేకుండా చేసింది.

2025- 2026 విద్యా సంవత్సరంలో ఏ ఒక్క విదేశీ విద్యార్థి కూడా హార్వర్డ్ యూనివర్శిటీలో అడ్మిషన్లు పొందలేరు. యూఎస్ డిపార్ట్‌మెంట్ ఆఫ్ హోమ్‌ల్యాండ్ సెక్యూరిటీస్ ఆదేశాల ప్రకారం- ఇప్పటికే ఉన్న అంతర్జాతీయ విద్యార్థులు తమ విసానుకొనసాగించుకోవాలనుకుంటే మరో విద్యాసంస్థ లేదా యూనివర్శిటీకి బదిలీ కావాల్సి ఉంటుంది.

స్టూడెంట్ అండ్ ఎక్స్ఛేంజ్ విజిటర్ ప్రోగ్రామ్ సర్టిఫికేషన్ రద్దు అంటే 2025-2026 విద్యా సంవత్సరానికి ఎఫ్ లేదా జే వలసేతర హోదాపై ఉన్న ఏ గ్రహాంతరవాసులు (విదేశీ విద్యార్థులు) హార్వర్డ్ లో అడ్మిషన్లు పొందడాన్ని నిషేధించినట్లు ట్రంప్ అడ్మినిస్ట్రేషన్ వెల్లడించింది. ఈ మేరకు హోమ్ ల్యాండ్ సెక్యూరిటీ ఓ ప్రకటన జారీ చేసింది.

ఇప్పుడున్న విద్యార్థులను మరొక విశ్వవిద్యాలయానికి బదిలీ చేయాలని ఇందులో పొందుపరిచింది. ఈ మేరకు ఈ ఉత్తర్వులను యూఎస్ డిపార్ట్‌మెంట్ ఆఫ్ హోమ్‌ల్యాండ్ సెక్యూరిటీస్ కార్యదర్శి క్రిస్టీ నోయెమ్ తెలిపారు. దీనికి సంబంధించిన సమాచారాన్ని ఎక్స్ లో పోస్ట్ చేశారు.

హార్వర్డ్ యూనివర్శిటీ అధికారులు హింసాత్మక పరిస్థితులు, యూదుల పట్ల వ్యతిరేకతను పెంపొందించడం, క్యాంపస్‌లో చైనా కమ్యూనిస్ట్ పార్టీతో సంబంధాలను కలిగివుండటమే దీనికి కారణమని పేర్కొన్నారు. యూనివర్శిటీలు విదేశీ విద్యార్థులను చేర్చుకోవడం, వారి అధిక ట్యూషన్ చెల్లింపుల నుండి ప్రయోజనం పొందడం సరికాదని చెప్పారు.

పాలస్తీనా మిలిటెంట్ గ్రూప్ హమాస్‌కు మద్దతు ఇస్తున్నారని ఆరోపిస్తూ, గాజాలో యుద్ధానికి వ్యతిరేకంగా నిరసనల్లో పాల్గొన్న అంతర్జాతీయ విద్యార్థులను వీసాలు రద్దు చేసి, వారిని దేశం నుంచి బహిష్కరించేలా గతంలో ట్రంప్ ప్రభుత్వం చర్యలు తీసుకున్న విషయం తెలిసిందే.

English summary

A senior White House official says that the US Government Services Administration (GSA) to circulate a letter to the Federal agencies asking them to identify whether Harvard University contracts could be cancelled or redirect. అమెరికాలోని ప్రతిష్ఠాత్మక హార్వర్డ్ యూనివర్శిటీకి 100 మిలియన్ డాలర్ల కాంట్రాక్ట్ ను రద్దు చేయాలని అధ్యక్షుడు డొనాల్డ్ ట్రంప్ అధికార యంత్రంగాన్ని ఆదేశించారు.