'మీ పని కూడా చూస్తా'.. కొలంబియా, మెక్సికో, క్యూబాలకు ట్రంప్ వార్నింగ్!

వెనిజులా అధ్యక్షుడు నికోలస్ మదురోను నిర్భంధించి న్యూయార్క్ జైలుకు తరలించిన మరుసటి రోజే (జనవరి 4, 2026).. అమెరికా అధ్యక్షుడు డొనాల్డ్ ట్రంప్ మరోసారి సంచలన వ్యాఖ్యలు చేశారు. కొలంబియా అధ్యక్షుడు గుస్తావో పెట్రోను ఉద్దేశించి 'జాగ్రత్తగా ఉండు' అంటూ బహిరంగంగా హెచ్చరించారు.

ట్రంప్ హెచ్చరికకు కారణమేంటి?
నికోలస్ మదురో అరెస్ట్ తర్వాత మీడియాతో మాట్లాడిన డొనాల్డ్ ట్రంప్.. కొలంబియాలో మత్తు పదార్థాల ఉత్పత్తిపై విరుచుకుపడ్డారు. "అతను (పెట్రో) కొకైన్ తయారు చేస్తున్నాడు, దానిని అమెరికాకు పంపిస్తున్నాడు. అందుకే అతను తన విషయంలో చాలా జాగ్రత్తగా ఉండాలి," అని ట్రంప్ వ్యాఖ్యానించారు. కొలంబియాలోని డ్రగ్ తయారీ కేంద్రాలపై కూడా దాడులు చేసే అవకాశాన్ని తాను కొట్టిపారేయలేనని ట్రంప్ గతంలోనే సూచించారు.

కొలంబియా అధ్యక్షుడు ఏమన్నారంటే?
వెనిజులాపై అమెరికా జరిపిన 'ఆపరేషన్ అబ్జల్యూట్ రిజాల్వ్'ను గుస్తావో పెట్రో తీవ్రంగా ఖండించారు. ఇది లాటిన్ అమెరికా దేశాల సార్వభౌమాధికారంపై దాడి అని ఆయన అభివర్ణించారు. అమెరికా చర్యల వల్ల ఈ ప్రాంతంలో మానవతా సంక్షోభం ఏర్పడుతుందని ఆందోళన వ్యక్తం చేశారు. అమెరికా దాడులను "దురాక్రమణ"గా పేర్కొంటూ, తమ భూభాగంపై దాడి జరిగితే అది యుద్ధ ప్రకటనగానే భావిస్తామని గతంలోనే హెచ్చరించారు.

ఇతర లాటిన్ అమెరికా దేశాలకు హెచ్చరికలు
ట్రంప్ కేవలం కొలంబియాతోనే ఆగకుండా మెక్సికో, క్యూబాల పట్ల కూడా తన వ్యూహాలను బయటపెట్టారు. "మెక్సికో అధ్యక్షురాలు క్లాడియా షీన్‌బామ్ మంచి మహిళే, కానీ దేశాన్ని ఆమె కాకుండా డ్రగ్ కార్టెల్స్ నడుపుతున్నాయి. కార్టెల్స్‌ను ఏరివేయడానికి మేము సహాయం చేస్తామన్నా ఆమె వద్దంటున్నారు." అని ట్రంప్ మెక్సికోను ఉద్దేశించి వ్యాఖ్యానించారు. వెనిజులా తర్వాత తర్వాతి లక్ష్యం క్యూబా కావొచ్చని అమెరికా విదేశాంగ మంత్రి మార్కో రూబియో సూచించారు. క్యూబా ప్రభుత్వం ఇప్పుడు ఆందోళన చెందాల్సిన సమయం అని ట్రంప్ సర్కారు పేర్కొంది.

వెనిజులా భవిష్యత్తుపై ట్రంప్ ప్రణాళిక
వెనిజులాలోని దెబ్బతిన్న చమురు మౌలిక సదుపాయాలను బాగు చేయడానికి అమెరికాకు చెందిన దిగ్గజ చమురు కంపెనీలను అక్కడికి పంపిస్తామని ట్రంప్ ప్రకటించారు. దేశంలో ప్రజాస్వామ్య బద్ధంగా అధికార మార్పిడి జరిగే వరకు అమెరికానే వెనిజులాను నడుపుతుందని ఆయన స్పష్టం చేశారు.

English summary

After the arrest of Venezuela President Nicolas Maduro, US President Donald Trump issued strong warnings to Colombia, Mexico and Cuba over drugs, cartels and regional security.